پینے کے صاف پانی کی شدید قلت کی وجہ سے پاکستان ہیپاٹائٹس جیسی مہلک بیماریوں کا شکار ہے‘احسن اقبال

نارووال(اُردو پوائنٹ اخبارتازہ ترین - این این آئی۔ 27 مئی2024ء) وفاقی وزیر منصوبہ بندی وترقی احسن اقبال نے کہا ہے کہ ملک میں پینے کے صاف پانی کی شدید قلت کی وجہ سے پاکستان ہیپاٹائٹس جیسی مہلک بیماریوں کا شکار ہے،وزیراعظم نے 8ارب روپے کی لاگت سے نیشنل نیوٹریشن پروگرام کا آغاز کیا ہے جس کے ذریعے غذائیت کی کمی سے نمٹا جائے گا۔ ان خیالات کا اظہار انہوں نے شہریوں کو پینے کے صاف پانی کی سہولت مہیا کرنے کے حوالے سے کمیونٹی انگیجمنٹ پروگرام کے تحت نیسلے کی جانب سے پرانی کچہری روڈ پر کلین اینڈ سیف ڈرنکنگ واٹر فسیلٹی کا افتتاح کرتے ہوئے کیا۔

روزانہ کی بنیادپر 10ہزار لوگوں کو 24ہزار لیٹر صاف پانی کی فراہمی کرنے والے ماڈرن واٹرفلٹریشن پلانٹ کے متعلق احسن اقبال نے کہا کہ یہ ایک ماڈرن پلانٹ نارووال میں روزانہ 10ہزار لوگوں کو پینے کا صاف پانی مہیا کرے گا جو کسی نعمت سے کم نہیں ہے۔

(جاری ہے)

ہمارے ملک میں پینے کے صاف پانی کی شدید قلت ہے جسکی وجہ سے پاکستان ہیپاٹائٹس جیسی مہلک بیماریوں کا شکار ہے۔

وزیراعظم نے 8ارب روپے کی لاگت سے نیشنل نیوٹریشن پروگرام کا آغاز کیا ہے جس کے ذریعے غذائیت کی کمی سے نمٹا جائے گا۔پینے کے صاف پانی اور متوازن غذائیت پر فوکس کر کے ہی ہم ایک صحت مند قوم پیدا کرسکتے ہیں۔نیسلے فار ہیلڈی کڈ پروگرام کو ہم ہر سکول تک لے کر جانا چاہیے تاکہ ہمارے نونہالان کو متوازن غذا اور روزمرہ زندگی میں اسکی اہمیت کا علم حاصل ہو سکے۔

نارووال میں ہم متعلقہ محکموں سے پینے کے صاف پانی کے ٹیسٹ کروائیں گے تاکہ ہمیں معلوم ہوسکے کہ ہمارے لوگ جو پانی پی رہے ہیں وہ انکی صحت کیلئے کیسا ہے۔اپنے لوگوں کو مختلف بیماریوں سے بچانے کیلئے ہمیں صاف پانی اور غذائیت پر فوکس کرنا چاہیے ۔اس موقع پر نیسلے پاکستان لمیٹڈ کے کنٹری مینجر جیسن ایون سینا نے شرکا سے خطاب کرتے ہوئے انکی کمپنی کی جانب سے کمیونٹی انگیجمنٹ پروگرام کے تحت پاکستان بھر میں کمیونٹی ڈویلپمنٹ کے ہراجیکٹس بارے بتایا۔

بعد ازاں وفاقی وزیر منصوبہ بندی وترقی پروفیسر احسن اقبال چودھری نے ڈپٹی کمشنر نارووال سید حسن رضا،کنٹری منیجر جیسن ایون سینا اور سی ای او ہیلتھ ڈاکٹر نوید حیدر کے ہمراہ وزیراعلی پنجاب کے ویژن کے مطابق چلائے جانے والے پروگرام کلینک آن وہیلز کا افتتاح بھی کردیا گیا۔