آئندہ مو ن سون کے دوران کسی بھی متوقع صورتحال سے نمٹنے کے لئے پیشگی فلڈفائٹنگ پلان تیار

جمعہ 7 جون 2024 12:56

فیصل آباد (اُردو پوائنٹ اخبارتازہ ترین - اے پی پی۔ 07 جون2024ء) محکمہ موسمیات کی جانب سے ۱ٓئندہ مو ن سون کے دوران معمول سے زیادہ بارشوں کی پیش گوئی اور کسی بھی متوقع صورتحال سے نمٹنے کے لئے فوری پیشگی فلڈ فائٹنگ پلان تیار کرلیا۔ اس حوالے سے محکمہ نے تمام تر ضروری مشینری چالوحالت میں رکھنے کی ہدایت کرتے ہوئے کہاکہ واسا،میونسپل کارپوریشنز، ٹاؤن انتظامیہ اور میونسپل کمیٹیزسمیت تمام متعلقہ سرکاری محکمے آئند ہ موسم برسات میں پیداہونیوالی کسی بھی ناخوشگوار صورتحال سے بچنے کے لئے پیشگی حفاظتی، تدارکی اقدامات مکمل رکھیں تاکہ متوقع طغیانی اور ممکنہ غیر معمولی بارشوں کے دوران کسی بھی ہنگامی حالت سے نمٹنے کیلئے کسی مشکل و پریشانی کاسامنا نہ کرناپڑے۔

فیصل آباد ڈویژنل انتظامیہ کے ترجمان نے بتایاکہ محکمہ انہار کے حکام انتظامی افسرا ن کے ساتھ مل کر دریاؤں کے حفاظتی بندوں کا مشترکہ معائنہ کریں گے اور اگر کسی جگہ پر حفاظتی بند کمزور پائے گئے تو وہاں فوری طور پر مرمت شروع کی جائے گی۔

(جاری ہے)

انہوں نے کنٹرول رومز وریلیف سنٹرز کے قیام،ٹرانسپورٹ سروسز،سٹاف کیلئے ڈیوٹی روسٹرسمیت دیگر ضروری اقدامات کومکمل رکھنے کی بھی ہدایت کی۔

انہوں نے کہا کہ گزشتہ دنوں مختلف شہروں میں ہونیوالی بارشوں کے باعث ڈینگی کی افزائش کے ممکنہ خطرات کو مدنظررکھتے ہوئے اس کی روک تھام کیلئے بھی مؤثر اقدامات کئے جائیں۔ انہوں نے ڈینگی کے خلاف بھرپورسماجی تحریک میں مزید تیزی لانے کی تاکید کرتے ہوئے کہا کہ سرکاری دفاتر کے سٹورز میں ناکارہ وفالتو اشیا اور دیگر کاٹھ کباڑ کو ضوابط کے تحت فارغ کردیں۔انہوں نے ٹائر شاپس،کباڑ خانوں،قبرستانوں سمیت ڈینگی کی پیدائش وافزائش کے دیگر ممکنہ ذرائع کو تسلسل سے چیک کرکے ڈینگی لاروا کی مکینیکل طریقے سے تلفی کویقینی بنانے کی بھی ہدایت کی۔