ڈاکٹر منور حسین نے سرسید یونیورسٹی آف انجینئرنگ اینڈ ٹیکنالوجی کے قائم مقام وائس چانسلر کا عہدہ سنبھال لیا

منگل 11 جون 2024 17:34

کراچی (اُردو پوائنٹ اخبارتازہ ترین - اے پی پی۔ 11 جون2024ء) ڈاکٹر منور حسین نے سرسید یونیورسٹی آف انجینئرنگ اینڈ ٹیکنالوجی کے قائم مقام وائس چانسلر کا عہدہ سنبھال لیا ہے۔

(جاری ہے)

منگل کو جاری کردہ اعلامیہ کے مطابق یونیورسٹی کے عہدیداروں، فیکلٹی ممبران اور عملے کے ساتھ اجلاس میں انہوں نے اس بات کا یقین دلایا کہ ذمہ داری کے اس عبوری دور میں یونیورسٹی کی میراث کو مزید مضبوط کرنے میں کوئی دقیقہ فروگزاشت نہیں کیاجائے گا۔

ڈاکٹر حسین انتظامی و کاروباری امور چلانے کا وسیع تجربہ رکھتے ہیں، وہ گزشتہ 35سالوں سے سندھ میڈیکل سینٹر، ہلالِ احمر سے بطور ڈائریکٹر منسلک ہیں، اس کے علاوہ وہ علی گڑھ مسلم یونیورسٹی اولڈ بوائز ایسوسی ایشن کی مینجنگ کمیٹی کے سنیئر ممبروں میں سے ہیں جبکہ ڈاکٹر منور حسین IDA RIEUویلفیئر ایسوسی ایشن کے اعزازی جنرل سیکرٹری بھی ہیں ۔