شہبازشریف نے ن لیگ برباد کردی‘ نوازشریف کے ساتھ گھر سے ہی ہاتھ ہوگیا، زعیم قادری

ن لیگ پورے لاہور سے ایک بھی سیٹ نہیں جیت پائی، الیکشن میں زیادہ ووٹ پی ٹی آئی کو پڑے لیکن حکومت ن لیگ نے بنالی، یہ منتخب حکومت نہیں، انہیں خود اقتدار چھوڑ دینا چاہیئے۔ سابق صوبائی وزیر کی گفتگو

ساجد علی پیر 5 اگست 2024 12:39

شہبازشریف نے ن لیگ برباد کردی‘ نوازشریف کے ساتھ گھر سے ہی ہاتھ ہوگیا، ..

لاہور ( اُردو پوائنٹ اخبارتازہ ترین۔ 05 اگست 2024ء ) پنجاب کے سابق صوبائی وزیر اور حال ہی میں مسلم لیگ ن چھوڑنے والے سیاسی رہنماء زعیم قادری کا کہنا ہے کہ 8 فروری کو الیکشن کی رات تک نواز شریف وزیر اعظم تھے لیکن ان کے ساتھ گھر سے ہی ہاتھ ہوگیا، شاہد خاقان عباسی کا قصور یہ تھا کہ وہ ووٹ کو عزت دو کی بات کرتا تھا۔ اے آر وائی نیوز سے گفتگو کرتے ہوئے انہوں نے کہا کہ شہباز شریف اپنے بھائی نوازشریف کو ایموشنل بلیک میل کرتے ہیں، مسلم لیگ ن کو شہباز شریف نے برباد کردیا اسی لیے ن لیگ پورے لاہور سے ایک بھی سیٹ نہیں جیت پائی، الیکشن میں زیادہ ووٹ پی ٹی آئی کو پڑے لیکن حکومت ن لیگ نے بنالی، فارم 45 اور 47 سب کے سامنے ہے خود فیصلہ کرلیں۔

زعیم قادری کا کہنا ہے کہ میں نے پہلے ہی کہہ دیا تھا کہ لاہور کسی کے باپ کی جاگیر نہیں، آپ اس وقت کسی بھی ن لیگی رہنماء سے پوچھ لیں کہ این اے 130 سے کون جیتا تھا تو وہ یہی کہے گا کہ ڈاکٹر یاسمین راشد جیتی گئی تھیں اور نواز شریف کو شکست ہوئی، خاکستر ہوتی ن لیگ کو بچانے کیلیے ضروری ہے کہ الیکشن کے نتائج کو تسلیم کرلیں کیوں کہ نوازشریف کو نمبر نہیں ووٹوں کی ضرورت پڑے گی، حکومت اپنی مدت پوری کر ہی نہیں سکتی اور نہ ہی اس کو یہ حق حاصل ہے کیوں کہ یہ عوام کی منتخب حکومت نہیں ہے اس لیے انہیں خود اقتدار کو چھوڑ دینا چاہیئے۔

(جاری ہے)

یاد رہے کہ زعیم قادری 2013ء کے انتخابات میں پنجاب اسمبلی کے حلقہ پی پی 154 سے الیکشن جیت کر رکنِ اسمبلی منتخب ہوئے تھے وہ بعد ازاں پنجاب حکومت کے مشیر اور پھر صوبائی کابینہ میں وزیر برائے مذہبی امور بھی رہے، زعیم حسین قادری کی اہلیہ عظمٰی قادری بھی ن لیگ کے ٹکٹ پر مخصوص نشستوں پر رکن پنجاب اسمبلی رہی ہیں، بعد ازاں انہوں نے پارٹی سے راہیں جدا کرلیں کیوں کہ زعیم قادری 2018ء کے عام انتخابات میں قومی اسمبلی کی نشست پر ن لیگ کے ٹکٹ کے خواہش مند تھے لیکن پارٹی نے اس بار بھی انہیں صوبائی اسمبلی کی نشست سے الیکشن لڑنے کا کہا جس پر وہ خوش نہیں تھے۔