Live Updates

شاہین کو شاہد آفریدی کی وجہ سے سزا دی گئی : باسط علی کا دعوی

اگر دوسرے ٹیسٹ میں شاہین ،نسیم ہوتے تو بنگلہ دیش 26/6 کیا اگر 70/2 کھلاڑی بھی آؤٹ ہوتے تو دونوں بولرز پوری ٹیم کو 200 رنز کے اندر اندر چلتا کرتے : سابق کرکٹر

ذیشان مہتاب بدھ 4 ستمبر 2024 16:15

شاہین کو شاہد آفریدی کی وجہ سے سزا دی گئی : باسط علی کا دعوی

لاہور (اردو پوائنٹ تازہ ترین اخبار۔ 4 ستمبر 2024ء ) سابق ٹیسٹ کرکٹر باسط علی نے کہا ہے کہ شاہین شاہ کو شاہد آفریدی کی وجہ سے سزا دی گئی ہے۔ نجی ٹی وی اے آر وائی نیوز کے پروگرام میں گفتگو کرتے ہوئے باسط علی نے کہا کہ میں کسی سے ڈرتا نہیں اور کھل کر کہتا ہوں کہ بنگلہ دیش کے خلاف دوسرے ٹیسٹ میچ سے شاہین شاہ آفریدی کو سزا کے طور پر ڈراپ کیا گیا اور انہیں یہ سزا ان کے سسر شاہد آفریدی کی وجہ سے دی گئی۔

باسط علی نے کہا کہ جب پہلے ٹیسٹ میچ میں شاہین آفریدی نے 32، 33 اوور کرا لیے تھے۔ وہ ردھم میں آچکے تھے اور وکٹیں بھی لی تھیں تو پھر دوسرے میچ کے لیے انہیں ڈراپ کرنے کا کیا جواز تھا۔ سابق ٹیسٹ کرکٹر نے کہا کہ پہلے تو ہم نے پچوں کی ریڈنگ ہی غلط کی۔ دونوں ٹیسٹ میچز کی پچز میں بہت فرق تھا۔

(جاری ہے)

پہلے میچ میں دو اسپنرز کھلائے جانے چاہیے تھے مگر وہاں ایک بھی نہیں کھلایا۔

دوسرے میچ کی پچ فاسٹ بولرز کو سوٹ کر رہی تھی۔ باسط علی نے مزید کہا کہ اگر اس میچ میں شاہین شاہ اور نسیم شاہ دونوں ہوتے تو بنگلہ دیش 26 پر 6 کیا اگر 70 پر دو کھلاڑی بھی آؤٹ ہوتے تو دونوں بولرز پوری ٹیم کو 200 رنز کے اندر اندر چلتا کرتے۔ ان کا کہنا تھا کہ دوسری اننگ میں 185 رنز کا ہدف کوئی بہت تر نوالہ نہیں تھا لیکن کپتان اپنے فیصلوں اور فیلڈ پلیسنگ سے آؤٹ کراتا ہے۔ اب پاکستان کے پاس قیادت کے لیے صرف ایک چوائس محمد رضوان کی صورت بچی ہے، اگر اسے کپتان بنایا جا سکتا ہے تو راتوں رات کوئی تبدیلی تو نہیں آئے گی، مگر موجودہ صورتحال میں کچھ بہتری ضرور آ سکتی ہے۔