Live Updates

یہ بچے ابھی آئے ہیں، ایک میچ ہارنے پر پیچھے نہ پڑیں : محمد عامر آغا الیون کی حمایت میں سامنے آگئے

جن کھلاڑیوں کے آپ نام لے رہو وہ پانچ چھ سال سے ٹیم کے ساتھ تھے ، کپتانی بھی کی ہے لیکن کچھ نہیں کیا : سابق فاسٹ باولر

ذیشان مہتاب منگل 16 ستمبر 2025 11:22

یہ بچے ابھی آئے ہیں، ایک میچ ہارنے پر پیچھے نہ پڑیں : محمد عامر آغا ..

لاہور (اردو پوائنٹ تازہ ترین اخبار ۔ 16 ستمبر 2025ء ) سابق فاسٹ بولر محمد عامر ایشیا کپ میں بھارت سے شکست کے بعد قومی ٹیم کے نوجوان کھلاڑیوں کی حمایت میں سامنے آگئے۔

سابق فاسٹ بولر محمد عامر نے کہا کہ جو چھ سال سے ٹیم میں تھے انہوں نے بھی کچھ نہیں کیا ، یہ بچے ایک میچ ہارے ہیں تو ان کے پیچھے ایسے پڑ گئے ہیں جیسے یہ پتا نہیں کہاں سے آئے ہیں۔

انہوں نے کہا کہ آپ افغانستان، آئرلینڈ سے بھی ہارے ہیں، امریکا سے ہارے جس ٹیم کا میں بھی حصہ تھا، اب ان پلیئرز کے پیچھے ایسے پڑ گئے ہو جیسے پتا نہیں کیا ہوگیا ہے، جن کھلاڑیوں کے آپ نام لے رہو وہ پانچ چھ سال سے ٹیم کے ساتھ تھے ،کپتانی بھی کی ہے لیکن کچھ نہیں کیا۔

محمد عامر نے کہا کہ خدا کا خوف کریں، پرفارمنس پر بات کرسکتے ہیں کہ حارث رؤف کو کھیلنا چاہیے، حسن نواز کہاں سے آگیا، محمد حارث کہاں سے آیا ہے اپنا ایجنڈا لے کر نہ بیٹھیں۔

(جاری ہے)

سابق فاسٹ بولر نے کہا کہ اگر تو ٹورنامنٹ ختم نہیں ہوا، لگتا یہی ہے کہ پاکستان، بھارت کا پھر میچ ہونا ہے آپ نے تو تنقید کی حد کردی، ان چیزوں سے نکل آئیں، یہ کھلاڑی ہمارا مستقبل ہیں۔

واضح رہے کہ ایشیا کپ ٹی ٹوئنٹی ٹورنامنٹ 2025 کے چھٹے میچ میں بھارت نے پاکستان کو 7 وکٹوں سے شکست دے دی۔

ایشیا کپ ٹی ٹونٹی ٹورنامنٹ میں گروپ اے کا ہائی وولٹیج میچ دبئی میں کھیلا گیا جہاں پاکستان نے روایتی حریف بھارت کے خلاف ٹاس جیت کر پہلے بیٹنگ کا فیصلہ کیا۔

بھارت کے خلاف پاکستان کی بیٹنگ لائن بری طرح لڑکھڑا گئی ، ٹاپ آرڈر آؤٹ آف آرڈر ہوگیا، قومی ٹیم بھارت کو جیت کیلئے 128 رنز کا ہدف دے سکی۔ پاکستانی ٹیم نے پہلےکھیلتے ہوئے مقررہ 20 اوورز میں 9 وکٹ کے نقصان پر 127 رنز بنائے۔ بھارت کیخلاف پاکستان کی پہلی وکٹ پہلی ہی گیند پر گری، صائم ایوب پانڈیا کی گیند پر بغیر کوئی رن بنائے آؤٹ ہوگئے۔

پاکستان کے دوسرے آؤٹ ہونے والے کھلاڑی محمد حارث تھے جو 6 کے مجموعی اسکور پر 3 رنز بنا کر بمراہ کے ہاتھوں وکٹ گنوا بیٹھے۔ 45 کے مجموعی اسکور پر فخر زمان 17 رنز بنا کر آؤٹ ہوئے، انہیں اکشر پٹیل نے آؤٹ کیا۔ ان کے بعد پاکستانی کپتان سلمان آغا بھی 3 رنز بنا کر اکشر پٹیل کے ہاتھوں آؤٹ ہوگئے۔ سلمان آغا کے بعد آنے والے بلے باز حسن نواز بھی64 کے مجموعی اسکور پر 5 رنز بنا کر پویلین لوٹ گئے، انہیں کلدیپ یادیو نے آؤٹ کیا۔

ان کے بعد حسن نواز بھی پہلی ہی گیند پر کلدیپ یادیو کا شکار بن گئے۔ 83 رنز پر صاحبزادہ فرحان بھی ہمت ہار گئے اور کلدیپ یادیو کو وکٹ دے بیٹھے، انہوں نے 44 گیندوں پر 40 رنز بنائے۔ پاکستان کی آٹھویں وکٹ 97 رنز پر گری جب فہیم اشرف 11 رنز بنا کر آؤٹ ہوئے۔ بھارت کیخلاف پاکستان کی نویں وکٹ 111 رنز پرگری، سفیان مقیم 10رنز بنا کر آؤٹ ہوئے۔ شاہین آفریدی نے شاندار بلے بازی کا مظاہرہ کرتے ہوئے ٹیم کو سہارا دیا اور 16 گیندوں پر 4 چھکوں کی مدد سے 33 رنز کی ناقابل شکست اننگز کھیلی۔

بھارت کی جانب سے کلدیپ یادیو نے 3، بمراہ اور اکشر پٹیل نے 2،2 وکٹیں حاصل کیں۔ بھارت نے 127 رنز کا ہدف 16 ویں اوور میں 3 وکٹ کے نقصان پر پورا کرلیا۔ بھارت کی جانب سے ابھیشک شرما اور تلک ورما نے 31،31 رنز بنائے، شبمن گل 10 رنز بناسکے۔ ان کے علاوہ شیوم دوبے نے 10 اور کپتان سوریا کمار یادیو نے 47 رنز بنائے اور ناقابل شکست رہے۔ پاکستان کی جانب سے تینوں وکٹیں صائم ایوب نے حاصل کیں۔