بھارت اور بنگلہ دیش کے درمیان دو ٹیسٹ میچوں کی سیریز کا پہلا ٹیسٹ 19 ستمبر سے شروع ہوگا

چنائی (اُردو پوائنٹ اخبارتازہ ترین - اے پی پی۔ 16 ستمبر2024ء) بھارت اور بنگلہ دیش کی کرکٹ ٹیموں کے درمیان دو ٹیسٹ میچوں پر مشتمل سیریز کا پہلا ٹیسٹ 19 23 ستمبر تک ایم چدمبرم سٹیڈیم،چنائی میں کھیلا جائے گا۔بنگلہ دیشی ٹیم ان دنوں بھارت میں ہے جہاں وہ اپنے دورہ کے دوران میزبان ٹیم کے خلاف 2 ٹیسٹ اور 3 ٹی ٹونٹی بین الاقوامی کرکٹ میچوں کی سیریز کھیلے گی۔

بھارت اور بنگلہ دیش کی ٹیموں کے درمیان دو ٹیسٹ میچوں کی سیریز کا آغاز 19 ستمبر کو پہلے میچ سے شروع ہوگا ،یہ میچ ایم چدمبرم سٹیڈیم،چنائی میں کھیلا جائے گا، دوسرا اور آخری ٹیسٹ میچ 27 ستمبر سے یکم اکتوبر تک گرین پارک،کانپور میں کھیلا جائے گا۔ ٹیسٹ سیریز میں بنگلہ دیشی ٹیم کو نجم الحسن شانٹو لیڈ کریں گے جبکہ میزبان بھارتی ٹیم کی قیادت مایہ ناز بلے باز روہت شرما کریں گے۔

(جاری ہے)

ٹیسٹ سیریز مکمل ہونے کے بعد دونوں ٹیموں کے درمیان تین ٹی ٹونٹی میچوں کی سیریز کا آغاز 6 اکتوبر کو پہلے میچ سے ہوگا جو نیو مادھوراؤ سندھیا کرکٹ سٹیڈیم، گوالیار میں کھیلا جائے گا۔دوسرا ٹی ٹونٹی 9 اکتوبر کو ارون جیٹلی سٹیڈیم ،نئی دہلی میں کھیلا جائے گا جبکہ تیسرا اور آخری ٹی ٹونٹی میچ 12 اکتوبر کو راجیو گاندھی انٹرنیشنل سٹیڈیم ،حیدر آباد میں کھیلا جائے گا۔