ایجنٹ مافیا کی سرکوبی ،شہریوں کو مزید سہولیات کی فراہمی ،نیو رجسٹریشن ،ٹرانسفر کیلئے ایکسائز ڈیپارٹمنٹ نے نئے ایس او پیز جاری کردیئے

جمعرات 19 ستمبر 2024 21:15

اسلام آباد (اُردو پوائنٹ اخبارتازہ ترین - این این آئی۔ 19 ستمبر2024ء) ایجنٹ مافیا کی سرکوبی ،شہریوں کو مزید سہولیات کی فراہمی کیلئے ایکسائز اینڈ ٹیکسیشن ڈیپارٹمنٹ اسلام آباد نے نئی گاڑی کی رجسٹریشن اور ٹرانسفر کیلئے ایس او پیز جاری کر دیئے۔ تفصیلات کے مطابق ایکسائز اینڈ ٹیکسیشن ڈیپارٹمنٹ اسلام آباد نے نئی گاڑی کی رجسٹریشن اور ٹرانسفر کیلئے ایس او پیز جاری کر دیئے ہیں۔

ایس او پیز کے مطابق اگر گاڑی کا مالک گاڑی کی رجسٹریشن اور ٹرانسفر کے لیے خود تشریف لا نہیں سکتا تو جس شخص کے زریعے بھی ڈاکومنٹیش کروائی جائے اس شخص کو اتھارٹی لیٹر یا بائیو میٹرک تصدیق ( متعلقہ شخص کا نام اور شناختی کارڈ نمبر کا اندراج کروا کر بائیو میٹرک) جاری کرے ۔اگر گاڑی مالکان رجسٹریشن کارڈز کی وصولی کیلئے خود ایکسائز آفس تشریف نہ لائے تو رجسٹریشن کارڈ وصولی کرنے والے کیلئے بھی بائیو میٹرک تصدیق لازمی قرار دے دی گئی ۔

(جاری ہے)

جاری بیان کے مطابق اسلام آباد ایکسائز آفس نے Door Step پالیسی کے تحت گھر یا آفس میں بھی گاڑی کی نیو رجسٹریشن اور ٹرانسفر کی سہولت بھی مہیاء کر رکھی ہے جس سے شہری استفادہ حاصل کر سکتے ہیں، ایکسائز اینڈ ٹیکسیشن ڈیپارٹمنٹ کے افسران اسلام آباد کی مختلف مارکیٹوں ،پارکوں اور اہم شاہرائوں پر بھی ایکسائز موبائل وین سروس میں سہولت فراہم کررہے ہیں ،گاڑیوں کی رجسٹریشن کیلئے آن لائن اپلائی بھی کیا جا سکتا ہے ۔

شہریوں سے اپیل ہے ایکسائز آفس گاڑیوں کی رجسٹریشن اور ٹرانسفر کے وقت سرکاری فیس کی وصولی کے بعد چلان ٹکٹ جاری کرتی ہے جس پر سرکاری فیس کی تمام تر تفصیلات کا اندراج ہوتا ہے ۔بیان میں کہا گیا ہے کہ شہری ایکسائز اینڈ ٹیکسیشن ڈیپارٹمنٹ کے متعلق کسی بھی قسم کی معلومات اور Doorstep کی سہولت حاصل کرنے کیلئے ہیلپ لائن نمبر 051-111-383-383پر ورکنگ ڈے میں صبح 8 بجے سے شام 4بجے تک معلومات حاصل کر سکتے ہیں۔