سفید چھڑی بصارت سے محروم افراد کی خود انحصاری اور خود اعتمادی کی علامت ہے، حکومت ان کے حقوق کے تحفظ کیلئے پرعزم ہے، سردارایاز صادق

پیر 14 اکتوبر 2024 22:09

اسلام آباد (اُردو پوائنٹ اخبارتازہ ترین - اے پی پی۔ 14 اکتوبر2024ء) سپیکر قومی اسمبلی سردارایازصادق نے کہا ہے کہ سفید چھڑی بصارت سے محروم افراد کے لئے خود انحصاری، خود اعتمادی اور آزادی کی علامت ہے، سفید چھڑی کا دن بصارت سے محروم افراد کی ہر ممکن معاونت، حوصلہ افزائی کرنے اور انہیں قومی دھارے میں شامل کرنے کی ترغیب دیتا ہے۔ قومی اسمبلی سیکرٹریٹ کے مطابق سفید چھڑی کے عالمی دن کے موقع پر سپیکر قومی اسمبلی سردار ایاز صادق نے بصارت سے محروم افراد کی ہمت اور استقامت کو خراج تحسین پیش کرتے ہوئے کہا کہ بصارت سے محروم افراد ہمارے معاشرے کا ایک اہم حصہ ہیں، ان کی فلاح و بہبود اور حوصلہ افزائی ہماری اجتماعی ذمہ داری ہے۔

انہوں نے کہا کہ بصارت سے محروم افراد کی صلاحیتوں کو بروئے کار لا کر انہیں معاشرے کا کارآمد اور فعال شہری بنایا جا سکتا ہے۔

(جاری ہے)

انہوں نے بصارت سے محروم افراد کی صلاحیتوں کو بہتر طریقے سے استعمال کرنے اور انہیں معاشرتی زندگی میں فعال کردار ادا کرنے کے اقدامات اٹھانے کی ضرورت پر زور دیا تاکہ وہ بھی ایک باعزت اور کارآمد شہری کی حیثیت سے زندگی گزار سکیں۔

انہوں نے مزید کہا کہ بصارت سے محروم افراد کو تعلیم، روزگار اور دیگر شعبہ ہائے زندگی میں یکساں مواقع فراہم کئے جائیں تو یہ افراد معاشرے کی تعمیر و ترقی میں بھرپور کردار ادا کر سکیں گے۔ انہوں نے کہا کہ سفید چھڑی کا عالمی دن اس عزم کی تجدید کا دن ہے کہ ہم بصارت سے محروم افراد کے حقوق کے تحفظ اور ان کی زندگی کو آسان بنانے کے لئے ہر ممکن اقدامات کریں گے۔

ایاز صادق نے کہا کہ پاکستان کی پارلیمان موثر قانون سازی کے ذریعے خصوصی افراد کے حقوق کے تحفظ اور ان کی زندگی میں آسانیاں پیدا کرنے کے لئے پرعزم ہے۔ انہوں نے مزید کہا کہ قومی اسمبلی نے بصارت سے محروم افراد کی سہولت کے لئے آئین پاکستان کو بریل رسم الخط میں مرتب کیا ہے اور قومی اسمبلی کی ویب سائٹ بصارت سے محروم افراد کے لئے قابل رسائی بنائی گئی ہے۔

انہوں نے کہا کہ قومی اسمبلی سیکرٹریٹ کی بلڈنگ کو خصوصی افراد کیلئے قابل رسائی بنایا گیا ہے ۔انہوں نے اس عزم کا اظہار کیا کہ قومی اسمبلی بصارت سے محروم افراد کی فلاح و بہبود اور ان کے حقوق کے تحفظ کے بھرپور کردار ادا کرتی رہے گی۔ انہوں نے بصارت سے محروم افراد کو خصوصی ٹیکنالوجی کی فراہمی کی ضرورت پر زور دیتے ہوئے کہا کہ جدید ٹیکنالوجی کی مدد سے بصارت سے محروم افراد کی زندگیوں میں آسانیاں پیدا کی جا سکتی ہیں۔