Live Updates

وقت آ گیا مسلم اُمہ کو یکجا ہو کر دنیا بھر میں مسلمانوں پر ہونیوالے مظالم کے خلاف آواز بلند کرنا ہوگی ،بیرسٹر سلطان چوہدری

بدھ 30 اکتوبر 2024 21:50

اسلام آباد (اُردو پوائنٹ اخبارتازہ ترین - این این آئی۔ 30 اکتوبر2024ء) صدر آزادجموں وکشمیر بیرسٹر سلطان محمود چوہدری نے کہا ہے کہ اب وقت آ گیا ہے کہ پوری مسلم اُمہ کو یکجا ہو کر دنیا بھر میں مسلمانوں پر ہونے والے مظالم کے خلاف آواز بلند کرنا ہوگی کیونکہ بھارت نے مقبوضہ جموں وکشمیر میں بھی کشمیریوں پر ظلم و جبر کے پہاڑ توڑ دئیے ہیں اور اسرائیل نے مظلوم فلسطینیوں پر بمباری کر کے اُن کا قتل عام شروع کر رکھا ہے تو ایسے وقت میں اسلامی تعاون تنظیم (او آئی سی) بالخصوص سعودی عرب کو فلسطینیوں پر ہونے والے مظالم اور مقبوضہ کشمیر میںکشمیریوں پر ہونے والے مظالم پر جاندار انداز میں آواز بلند کرنا ہو گی ۔

اسلامی تعاون تنظیم (او آئی سی) اور سعودی عرب نے ہمیشہ مسئلہ کشمیر پر ہمارے موقف کی تائید کی ہے اور مقبوضہ جموں وکشمیر پر بھارت کے ناجائز قبضے کو رد کیا ہے اور ہم امید کرتے ہیں کہ آئندہ بھی اسلامی تعاون تنظیم اور عرب ممالک مسئلہ کشمیر کے حل اور مقبوضہ کشمیر میں بھارتی مظالم بند کروانے کے لئے اپنا کردار ادا کریں گے۔

(جاری ہے)

سعودی عرب میں مقیم کشمیریوں کا وہاں کے قوانین کے مطابق مختلف فورمز پر مسئلہ کشمیر کو اُجاگر کرنے میں اہم کردار ہے ۔

ان خیالات کا اظہار انہوںنے آج یہاں ایوان صدر کشمیر ہائوس اسلام آباد میں اعزازی صدارتی مشیر برائے سعودی عرب چوہدری صغیر احمد سے ایک تفصیلی ملاقات میں کیا۔ اس موقع پر صدر ریاست آزاد جموں وکشمیر بیرسٹر سلطان محمود چوہدری نے مزید کہا کہ سعودی عرب میں مقیم کشمیری مسئلہ کشمیر کو عالمی سطح پر اُجاگر کرنے کے لئے کمر بستہ ہو جائیں۔

کیونکہ بھارت نے مقبوضہ جموں وکشمیر میں کشمیریوں پر ظلم و بربریت کی انتہاء کر دی ہے۔ ان تمام تر زیادتیوں کے باوجود کشمیریوں کے جذبہ حریت میں کوئی کمی نہ آئی ہے اس لئے دنیا بھر میں آباد کشمیریوں کو مظلوم کشمیریوں کی آواز بن کر بین الاقوامی برادری کے سامنے ہندوستان کے ان ناپاک عزائم کا پردہ چاک کرنا ہو گا اور ہماری یہ جدوجہد کشمیر کی آزادی تک جاری و ساری رہے گی۔