ضلعی انتظامیہ لاہور کی کارروائی ،سموگ ایس او پیز کی خلاف ورزی پر متعدد دکانیں سیل

لاہور (اُردو پوائنٹ اخبارتازہ ترین - اے پی پی۔ 19 نومبر2024ء) ضلعی انتظامیہ نےسموگ ایس او پیز کی خلاف ورزی پر متعدد دکانیں سیل کر دیں۔ترجمان کے مطابق مارکیٹس کو 8 بجے بند کروانے کے حکم پر عملدرآمد کےلئے ضلعی انتظامیہ لاہور رات گئے تک مختلف تحصیلوں میں بلا امتیاز کارروائیوں کے لیے متحرک رہی اور اوقاتِ کار کی خلاف ورزی پر 36 دکانیں سیل کر دی گئیں۔

اسسٹنٹ کمشنر ماڈل ٹاون صاحبزادہ یوسف نے تحصیل ماڈل ٹاون میں واقع منال پلازہ میں 4 دکانیں سیل کیں،تحصیل صدر میں اسسٹنٹ کمشنر عبدالباسط صدیقی نے 7 دکانوں اور 1 ڈیپارٹمنٹل سٹور کو خلاف ورزی پر سیل کیا۔اسسٹنٹ کمشنر راوی طارق بشیر کی قیادت میں تحصیل راوی میں پابندیوں پر عملدرآمد کا جائزہ لیا گیا اور اوقاتِ کار کی خلاف ورزی پر 10 دکانوں کو سیل کروایا گیا۔

(جاری ہے)

تحصیل رائیونڈ میں اسسٹنٹ کمشنر زینب طاہر نے پابندیوں پر عملدرآمد کے آپریشن کی قیادت کی اور 3 دکانوں اور 2 سیلون کو اوقات کار کی خلاف ورزی پر سیل کروایا۔ تحصیل شالیمار میں اسسٹنٹ کمشنر انعم فاطمہ نے 5 دکانوں کو لنک روڈ اور جی ٹی روڈ پر سیل کیا۔تحصیل واہگہ میں اسسٹنٹ کمشنر محمد عامر بٹ کی قیادت میں پابندیوں پر عملدرآمد کا جائزہ لیا گیا ،تحصیل واہگہ میں تمام دکانیں بند پائی گئیں۔

اسسٹنٹ کمشنر واہگہ نے ہوٹل مالکان کو ان ڈور ڈائننگ اور ٹیک آوے کے لئے نئے ایس او پیز بارے آگاہی بھی دی۔تحصیل نشتر میں اسسٹنٹ کمشنر محمد سلیم آسی نے اوقاتِ کار کی خلاف ورزی پر 4 دکانیں سیل کیں۔اس حوالے سے ڈی سی لاہور سید موسی رضا نے کہا کہ عوام سے سموگ کے دوران احتیاطی تدابیر اختیار کرنے اور مکمل تعاون کی اپیل ہے،شہری غیر ضروری سفر سے گریز کریں اور ماسک کا استعمال یقینی بنائیں۔

انہوں نے کہا کہ صاف اور صحت مند ماحول کے لیے سخت اقدامات جاری ہیں، پابندیوں کی خلاف ورزی پر بلاامتیاز کارروائیاں عمل میں لائی جائیں گی۔ ڈی سی لاہور نے کہا کہ شہری کسی بھی قسم کی متعلقہ معلومات کے حصول یا شکایت کی صورت میں ڈی سی آفس کنٹرول روم نمبر 03070002345 پر واٹس ایپ میسج یا ڈی سی آفس کے سوشل میڈیا پلیٹ فارمز پر میسج یا کمپلینٹ کی صورت میں رابطہ کر سکتے ہیں۔