وزیرداخلہ کا جناح سکوائرمری روڈ انڈر پاس پراجیکٹ کا دورہ ، شاہین چوک مارگلہ روڈ اورفیض آباد انٹرچینج کا معائنہ کیا

بدھ 30 اپریل 2025 18:16

اسلام آباد(اُردو پوائنٹ اخبارتازہ ترین - این این آئی۔ 30 اپریل2025ء)وفاقی وزیر داخلہ محسن نقوی نے رات گئے جناح سکوائر مری روڈ انڈر پاس پراجیکٹ کا دورہ کیا۔وفاقی وزیرداخلہ محسن نقوی نے شاہین چوک مارگلہ روڈ اور فیض آباد انٹرچینج کا بھی معائنہ کیا،انڈر پاس کی کھدائی مکمل کر لی گئی ہے جبکہ سٹیل فکسنگ سٹرکچر کا کام تیزی سے جاری ہے۔ وزیر داخلہ محسن نقوی نے جناح سکوائر مری روڈ انڈر پاس پر تعمیراتی کام پر پیشرفت کا جائزہ لیا اور کام کی رفتار پر اطمینان کا اظہار کیا۔

انہوں نے جناح سکوائر مری روڈ انڈر پاس پراجیکٹ کو مقررہ مدت میں مکمل کرنے کی ہدایت کرتے ہوئے کہا کہ ریکارڈ مدت میں منصوبے کی تکمیل کے لیے تمام تر توانائیاں بروئے کار لائی جائیں۔ وزیر داخلہ نے جناح سکوائر سے فیض آباد چوک تک شاہراہ کو ماڈل روڈ بنانے کی ہدایت کی،۔

(جاری ہے)

وفاقی وزیرداخلہ محسن نقوی نے ہدایت کی کہ جناح سکوائر سے فیض آباد چوک تک شاہراہ پر خوبصورت لائٹس لگائی جائیں اور لینڈ سکیپنگ کی جائے۔

وزیر داخلہ محسن نقوی نے مارگلہ روڈ پر شاہین چوک کا بھی دورہ کیا۔ ٹریفک کے رش کے خاتمیکیلئے مارگلہ روڈ کو مرحلہ وار سگنل فری بنایا جائے گا۔ وزیر داخلہ نے فیض آباد انٹرچینج کی ری ماڈلنگ پر کام جلد شروع کرنے کی ہدایت کرتے ہوئے کہا کہ فیض آباد انٹرچینج اسلام آباد اور راولپنڈی کے درمیان اہم ترین کنکشن ہے، فیض آباد انٹرچینج کو کشادہ کیا جائے گا تاکہ ٹریفک کے بہاؤ میں بہتری لائی جا سکے۔

انہوں نے کہا کہ ہمارا مقصد اسلام آباد کو عوامی سہولتوں کے حوالے سے عالمی معیار کا شہر بنانا ہے۔ چیئرمین سی ڈی اے محمد علی رندھاوا نے منصوبوں سے متعلق وزیر داخلہ محسن نقوی کو بریفنگ دیتے ہوئے کہا کہ جناح سکوائر مری روڈ انڈر پاس پراجیکٹ پر کام تیزی سے جاری ہے، انشاء اللہ منصوبے کو مقررہ وقت میں مکمل کیا جائے گا۔ بریفنگ میں مزید بتایا گیا کہ مارگلہ روڈ پر سب سے زیادہ رش شاہین چوک کے مقام پر ہوتا ہے، شاہین چوک پر انڈر پاس کی تعمیر مارگلہ روڈ پر ٹریفک کے بہاؤ کو بہتر بنانے میں معاون ثابت ہو گی۔