Live Updates

پی ٹی آئی نے سپیکر کی دعوت قبول کرلی، مذاکرات کا ڈرافٹ تیار

تحریک انصاف کی کمیٹی کل ملاقات کے لیے جائے گی، کل ہمیں اندازہ ہو جائے گا حکومت مذاکرات میں کتنی سنجیدہ ہے، پیشرفت سے عمران خان کو آگاہ کیا جائے گا؛ سیکریٹری اطلاعات پی ٹی آئی شیخ وقاص اکرم کی گفتگو

ساجد علی اتوار 22 دسمبر 2024 15:31

پی ٹی آئی نے سپیکر کی دعوت قبول کرلی، مذاکرات کا ڈرافٹ تیار

پشاور ( اُردو پوائنٹ اخبارتازہ ترین۔ 22 دسمبر 2024ء ) پاکستان تحریک انصاف نے مذاکرات کے لیے سپیکر قومی اسمبلی سردار ایاز صادق کی دعوت قبول کرلی۔ تحریک انصاف کے سیکریٹری اطلاعات شیخ وقاص اکرم نے بتایا کہ حکومت نے مذاکراتی کمیٹی کا اعلان کر دیا ہے، جس کے بعد پی ٹی آئی نے مذاکرات کیلئے سپیکر کی ملاقات کی دعوت قبول کرلی، تحریک انصاف کی کمیٹی کل ملاقات کے لیے جائے گی، کل ان مذاکراتی کمیٹیوں کی ملاقات ہوگی، جس میں دونوں اطراف سے اپنے اپنے خیالات سامنے رکھے جائیں گے، کل ہمیں اندازہ ہو جائے گا کہ حکومت اور اس کی کمیٹی مذاکرات میں کتنی سنجیدہ ہے۔

انہوں نے کہا کہ ہمارے ایشوز اور جو نکات عمران خان نے دیئے ہیں اس کے حل کے لیے حکومت کس قدر سنجیدہ ہے اس کا پتا چل جائے گا، حکومتی کمیٹی سے ملاقات کے بعد ہماری کمیٹی کل ہی اڈیالہ جیل میں عمران خان سے ملاقات کرنے کی خواہش مند ہے، کمیٹی بانی چیئرمین کو ساری پیشرف سے اگاہ کرے گی، عمران خان سول نافرمانی تحریک سے متعلق جو فیصلہ لیں گے وہ فیصلہ عوام کو بتا دیا جائے گا۔

(جاری ہے)

شیخ وقاص اکرم کا کہنا ہے کہ سول نافرمانی کی کال ابھی تک موجود ہے، سول نافرمانی کی کال بانی چیئرمین پی ٹی آئی کی تھی اور اسے وہ خود ہی واپس لے سکتے ہیں، کل حکومتی سنجیدگی اور کمیٹی کے حوالے سے جو پیش رفت ہوگی عمران خان کو اس سے اگاہ کیا جائے گا، جس کے بعد مذاکرات کے اگے بڑھنے سے متعلق حتمی فیصلہ بانی پی ٹی آئی ہی لیں گے۔ میڈیا رپورٹس میں ذرائع نے بتایا کہ پاکستان تحریک انصاف نے حکومت سے مذاکرات کیلئے مطالبات کا ڈرافٹ بھی تیار کر لیا ہے، پی ٹی آئی کی جانب سے 5 ہزار سے زائد سیاسی قیدیوں کی فہرست تیار کرلی گئی، سیاسی قیدیوں کی فہرست میں عمران خان کا نام سرفہرست رکھا گیا ہے کیوں کہ مذاکرات کے دوران پی ٹی آئی سیاسی قیدیوں کی رہائی کے علاوہ 9 مئی اور 26 نومبر کے واقعات کی تحقیقات کیلئے جوڈیشل کمیشن کے قیام کے مطالبات بھی رکھے جائیں گے۔