رواں برس سکیورٹی فورسز کے کامیاب آپریشنز میں 925 دہشتگرد ہلاک، سینکڑوں گرفتار

گزشتہ 5 سالوں میں کسی ایک سال میں مارے جانے والے دہشت گردوں کی یہ سب سے بڑی تعداد ہے؛ رپورٹ

ساجد علی اتوار 29 دسمبر 2024 10:59

رواں برس سکیورٹی فورسز کے کامیاب آپریشنز میں 925 دہشتگرد ہلاک، سینکڑوں ..

راولپنڈی ( اُردو پوائنٹ اخبارتازہ ترین۔ 29 دسمبر 2024ء ) رواں برس سکیورٹی فورسز کے کامیاب آپریشنز میں 925 دہشت گرد مارے گئے اس دوران سینکڑوں کو گرفتار بھی کرلیا گیا۔ میڈیا رپورٹس کے مطابق سال2024ء کے دوران مجموعی طور پر سکیورٹی فورسز اور قانون نافذ کرنے والے اداروں نے دہشت گردوں اور اُن کے سہولت کاروں کے خلاف 59 ہزار 775 مختلف نوعیت کے کامیاب انٹیلی جنس بیسڈ آپریشنز کیے، ان کامیاب آپریشنز کے دوران 925 دہشت گردوں بشمول خوارج کو ہلاک کردیا گیا جب کہ سینکڑوں گرفتار کیے گئے، گزشتہ 5 سالوں میں کسی ایک سال میں مارے جانے والے دہشت گردوں کی یہ سب سے بڑی تعداد ہے۔

بتایا گیا ہے کہ پاکستان نے دہشتگردی کے خلاف ایک طویل جنگ لڑی ہے، اس جنگ میں افواجِ پاکستان نے بیش بہا قربانیاں دی ہیں، دہشت گردی کے اس ناسور سے نمٹنے کے لیے روزانہ کی بنیاد پر169سے زائد آپریشنز افواجِ پاکستان، انٹیلی جنس، پولیس اور دیگر قانون نافذ کرنے والے ادارے اَنجام دے رہے ہیں، اس حوالے سے انٹیلی جنس ایجنسیز، قانون نافذ کرنے والے اداروں اور سیکورٹی فورسز کے بروقت اقدامات کی وجہ سے دہشتگردی کے کئی منصوبوں کو کامیابی سے ناکام بنایا۔

(جاری ہے)

معلوم ہوا ہے کہ قانون نافذ کرنے والے اداروں کو دُشمن کے نیٹ ورکس پکڑنے اور دہشتگردوں کو کیفرِ کردار تک پہنچانے میں بھی اہم کامیابیاں ملیں، ان کارروائیوں میں دہشت گردوں سے بھاری مقدار میں بیرونی ساختہ اسلحہ وگولہ بارود بھی برآمد کیا گیا، ان آپریشنز کے دوران73 انتہائی مطلوب دہشتگردوں کی ہلاکتیں ہوئیں، اس کے علاوہ دہشت گردی میں ملوث 27 افغان دہشت گردوں کو سکیورٹی فورسز کی جانب سے نشانہ بنایا گیا۔