سعودی عرب،سفرحج بارے نسک پورٹل کا اپ ڈیٹ ورژن لانچ ، نئی سروسز متعارف،100سے زائداضافی سروسزشروع

منگل 14 جنوری 2025 12:46

ریاض(اُردو پوائنٹ اخبارتازہ ترین - این این آئی۔ 14 جنوری2025ء)سعودی عرب کے وزیرحج وعمرہ ڈاکٹر توفیق الربیعہ نے جدہ میں سفرحج کے حوالے سے نسک پورٹل کا اپ ڈیٹ ورژن لانچ کر دیاجس میں 100سے زائد اضافی سروسز شروع کی گئی ہیں۔عرب میڈیا کے مطابق انہوں نے حج کانفرنس ونمائش کے چوتھے ایڈیشن کے افتتاحی اجلاس سے خطاب کرتے ہوئے کہا کہ شاہ سلمان بن عبدالعزیز خاص ہدایات اور ولی عہد شہزادہ محمد بن سلمان کے تعاون سے گزشتہ سال حج وعمرہ زائرین کی تعداد 18.5ملین سے تجاوز کرگئی۔

وزیر حج نے کہا کہ گزشتہ سال مسجد نبویﷺ میں روضہ شریفہ کی زیارت کرنے والوں کی تعداد 13ملین سے زیادہ رہی ہے۔ حجاج و زائرین کی سہولت کیلئے اعلیٰ تربیت یافتہ عملے اور ڈیجیٹل حج آپریشنز کے جامع نظام نے حج خدمات کی بہتر و منظم فراہمی کو یقینی بنایا۔

(جاری ہے)

انہوں نے کہا کہ سفر حج جو کبھی بہت مشقت و تھکا دینے والا ہوتا تھا اب بہترین اور مثالی خدمات کی فراہمی کے باعث آسان اور اطمینان بخش ہو گیا ہے۔

انہوں نے اس بات پر زور دیا کہ مملکت کے پیشِ نظراللہ کے مہمانوں کی خدمت اولین ترجیح ہے۔ وزیر حج نے کہا کہ سو برس قبل حجاج کی تعداد 50ہزار ہوا کرتی تھی جو اب 20لاکھ کے قریب پہنچ چکی ہے۔مملکت دنیا بھر سے آنے والے ضیوف الرحمن سفرِ حج کے لیے ہر ممکن سہولت فراہم کرنے کے لیے کوشاں ہے،33ممالک کا دورہ کیا تاکہ حجاج کی ضرورتوں کا جائزہ لیے کر فراہم کی جانے والی خدمات کے معیار کو بہتر سے بہتر بنایا جاسکے۔انہوں نے حج کے حوالے سے حکمت عملی کی نشاندہی کرتے ہوئے کہا کہ 2024تک جامع منصوبے مرتب کئے ہیں ۔ سالانہ بنیادوں پر حج امور کو منظم کیا جاتا ہے جس کا آغاز 12ذوالحجہ سے آئندہ برس کیلئے کیا جاتا ہے۔