ڈونلڈ ٹرمپ نے عالمی فوجداری عدالت پرپابندیاں عائد کردیں

عالمی فوجداری عدالت نے امریکا اور اسرائیل کو غیر منصفانہ طور پر نشانہ بنایا، امریکی صدر

جمعہ 7 فروری 2025 13:37

ڈونلڈ ٹرمپ نے عالمی فوجداری عدالت پرپابندیاں عائد کردیں

واشنگٹن (اُردو پوائنٹ اخبارتازہ ترین - این این آئی۔ 07 فروری2025ء)امریکی صدر ڈونلڈ ٹرمپ نے عالمی فوجداری عدالت (انٹرنیشنل کریمنل کورٹ)پر پابندیاں عائد کر دیں۔وائٹ ہائوس کے مطابق عالمی فوجداری عدالت (آئی سی سی)کے حکام ملازمین اور ان کے اہلِ خانہ کے اثاثے منجمد کر دیے گئے اور ان پر سفری پابندیاں بھی عائد کر دی گئیں۔اس حوالے سے ڈونلڈ ٹرمپ کا کہنا تھا کہ عالمی فوجداری عدالت نے امریکا اور اسرائیل کو غیر منصفانہ طور پر نشانہ بنایا ہے۔

(جاری ہے)

انہوں نے کہا کہ عالمی فوجداری عدالت نے نیتن یاہو کے وارنٹ جاری کر کے اختیارات کا غلط استعمال کیا ہے۔وائٹ ہاوس کی جانب سے بتایا گیا ہے کہ صدر ڈونلڈ ٹرمپ نے عالمی فوجداری عدالت پر پابندی کے صدارتی حکم نامے پر دستخط بھی کر دئیے ۔امریکا اور اسرائیل عالمی فوجداری عدالت کے رکن نہیں ہیں۔واضح رہے کہ عالمی عدالت نے غزہ میں جنگی جرائم پر اسرائیلی وزیرِ اعظم نیتن یاہو کے وارنٹ جاری کیے تھے۔عالمی عدالت نے غزہ میں جنگی جرائم پر اسرائیلی وزیرِ دفاع یووگیلنٹ کے بھی وارنٹ جاری کیے تھے۔