فیصل چوہدری کی گرفتاری وکلاءکی توہین ہے ، فوا د چوہدری کا بانی پی ٹی آئی کے وکیل کی گرفتاری پر ردعمل

حکومت اوچھے ہتھکنڈوں پر اتر آئی ہے ،ہم ایسی حرکتوں سے گھبرانے والے نہیں ہیں ،عدالت نے فیصل چوہدری کو عمران خان سے ملاقات کی اجازت دی تھی اس کے باوجود پولیس نے گرفتار کرلیا، سابق وفاقی وزیر

فیصل علوی جمعہ 7 فروری 2025 17:01

فیصل چوہدری کی گرفتاری وکلاءکی توہین ہے ، فوا د چوہدری کا بانی پی ٹی ..

اسلام آباد(اردوپوائنٹ اخبار تازہ ترین۔07 فروری 2025) سابق وفاقی وزیر فوا د چوہدری کا کہنا ہے کہ فیصل چوہدری کو اڈیالہ جیل کے باہر سے گرفتار کرلیا گیا ہے ، یہ گرفتاری وکلاء کی توہین ہے ۔ سماجی رابطے کے پلیٹ فارم ایکس (ٹوئیٹر) پر اپنی شیئر کردہ پوسٹ میں انہوں نے بانی پی ٹی آئی کے وکیل فیصل چوہدری کی گرفتاری کی اطلاع دی اورکہا کہ ایسی گرفتاری تمام وکلاء تمام وکلا برادری کی توہین ہے۔

بانی پی ٹی آئی عمران خان کے وکیل فیصل چوہدری کو حراست میں لیاگیاتھا۔ اڈیالہ جیل کے باہر پولیس کی اضافی نفری پہنچ گئی تھی جبکہ جیل کے باہر پولیس کی نقل و حرکت میں بھی اضافہ دیکھنے میں آیا ہے۔ بانی پی ٹی آئی کے وکیل فیصل چوہدری بانی پی ٹی آئی سے ملاقات کیلئے کچھ دیر قبل اڈیالہ جیل پہنچے تھے۔

(جاری ہے)

عدالت نے جیل حکام کو بانی پی ٹی آئی سے وکلاءکی ملاقات کرانے کا حکم دیا تھا۔

یہ بھی بتایا گیا تھا کہ پی ٹی آئی کی لیگل ٹیم بانی پی ٹی آئی عمران خان سے اڈیالہ جیل میں ملاقات کرے گی۔ راولپنڈی کی انسداد دہشت گردی عدالت نے فیصل چوہدری ایڈووکیٹ کو عمران خان سے ملاقات کی اجازت دی تھی۔واضح رہے کہ گزشتہ روز پاکستان تحریک انصاف کے بانی عمران خان کے وکیل فیصل چوہدری کو اڈیالہ جیل میں داخلے سے روکا گیا تھا۔اڈیالہ جیل کے داخلی گیٹ پر فیصل چوہدری اور جیل کے عملے کے مابین تلخ کلامی ہوئی تھی۔

فیصل چوہدری نے اڈیالہ جیل چوکی میں جیل انتظامیہ کے خلاف مقدمہ کی درخواست دی تھی۔ اڈیالہ جیل چوکی نے فیصل چوہدری کی درخواست وصول کرلی تھی۔

بانی پی ٹی آئی کے وکیل فیصل چوہدری نے درخواست میں تحریر کیا تھاکہ بانی پی ٹی آئی کے تمام کیسز میں میرا وکالت نامہ جمع تھا۔جیل عملے نے مجھے داخلی دروازے پر روک دیا اور اندر جانے نہیں دیا گیاتھا۔

وکیل فیصل چوہدری نے اپنی درخواست یہ بھی کہا تھا کہ ملزمان کے خلاف قانونی کارروائی کی جائے۔فیصل چوہدری نے کہا احتجاج پر مجھے ڈپٹی سپرنٹنڈنٹ جیل کے کمرے میں دو گھنٹے تک بٹھایا گیاتھا اور حبس بیجا میں رکھا گیاتھا۔ جیل عملہ میرے اور میرے ساتھ آئے ہوئے سائلین کو ہراساں کرتا رہا تھا۔