کچھی کینال سے زرعی انقلاب آئے گا‘ وزیراعلیٰ بلوچستان سرفرازبگٹی

جمعہ 14 فروری 2025 22:32

ڈیرہ بگٹی (اُردو پوائنٹ اخبارتازہ ترین - آن لائن۔ 14 فروری2025ء)وزیراعلیٰ بلوچستان سرفراز بگٹی نے کہا ہے کہ کچھی کینال سے زرعی انقلاب آئے گا۔ ڈیرہ بگٹی میں تقریب سے خطاب میں سرفراز بگٹی نے کہا کہ اب سوئی کے بچے بھی وہاں پڑھیں گے جہاں سرداروں کے بچے پڑھتے ہیں، غریب کے بچے تعلیم حاصل کریں گے، میرٹ پر داخلے دیے جائیں گے، پورے بلوچستان سے 30 ہزار نوجوان باہر جائیں گے۔

(جاری ہے)

انہوں نے کہا کہ بلوچستان کی ترقی کے لیے وفاقی حکومت کے تعاون کو سراہتے ہیں، میں نے کہا تھا سوئی ماڈل ٹاؤن بنے گا، آج ہم اسے دوبارہ شروع کررہے ہیں، سوئی میں ہر گلی کو پکا کیا جائے گا۔وزیرِ اعلیٰ کا کہنا ہے کہ ہم تاریخ میں نہیں جانا چاہتے، سوئی سے گیس نکل رہی ہے لیکن آج بھی وہاں کھنڈر نظر آ رہا ہے، اگر وفاقی حکومت ہمارے ساتھ آتی ہے تو ہمیں خوشی ہو گی۔

سرفراز بگٹی نے مزید کہا کہ پی پی ایل ہر سال سوئی کے 50 بچوں کو اعلیٰ تعلیم دلوائے گی، اسی کے تعاون سے سوئی ماڈل ٹاون بنانے جا رہے ہیں، 10 سال پرانی بلڈنگ کی تعمیرِ نو یہی ادارہ کرے گا۔انہوں نے بتایا کہ پانی کا ایک دیرینہ مسئلہ ہے، اب 10 لاکھ گیلن پانی سوئی کے لوگوں کا دیا جائے گا، بگٹیوں نے ہمارے اس معاہدے میں بڑا کردار ادا کیا ہے۔