Live Updates

آئی ایم ایف سے موسمیاتی فنڈنگ پر مذاکرات، کاربن لیوی عائد کرنے کی تجویز

آئی ایم ایف وفد کے ساتھ ابتدائی مسودے پر بات چیت کی جائے گی، اس حوالے سے آئی ایم ایف کی جانب سے پاکستان کو تجاویز فراہم کی جائیں گی

ساجد علی پیر 24 فروری 2025 11:06

آئی ایم ایف سے موسمیاتی فنڈنگ پر مذاکرات، کاربن لیوی عائد کرنے کی تجویز

اسلام آباد ( اُردو پوائنٹ اخبارتازہ ترین۔ 24 فروری 2025ء ) آئندہ مالی سال 2025/26ء کیلئے بجٹ میں کاربن لیوی عائد کرنے کی تجویز سامنے آگئی۔ میڈیا رپورٹس کے مطابق عالمی مالیاتی فنڈ آئی ایم ایف کا تکنیکی وفد کلائمیٹ فنانسنگ پر مذاکرات کیلئے پاکستان پہنچ گیا، آئی ایم ایف کا یہ تکنیکی مشن اسلام آباد میں آج پاکستان کی جانب سے موسمیاتی مزاحمت کے لیے اضافی 1.5 ارب ڈالر کی مالی معاونت کی درخواست پر مذاکرات کا آغاز کر رہا ہے، مذاکرات میں کاربن لیوی کے نفاذ، الیکٹریکل وہیکلز اور سبسڈی کے معاملات پر بھی غور کیا جائے گا۔

ذرائع نے بتایا ہے کہ یہ مذاکرات تین ہفتوں تک جاری رہیں گے، جس میں مذکورہ تکنیکی ٹیم منصوبہ بندی، خزانہ، موسمیاتی تبدیلی، پیٹرولیم، اور آبی وسائل کی اہم وزارتوں کے ساتھ ساتھ فیڈرل بورڈ آف ریونیو، آفات سے نمٹنے والے اداروں اور صوبائی حکومتوں کے ساتھ مشاورت کرے گی، آئندہ مالی سال 2025/26ء کے بجٹ میں کاربن لیوی عائد کرنے کی تجویز دی گئی ہے، جس پر آئی ایم ایف وفد کے ساتھ ابتدائی مسودے پر بات چیت کی جائے گی، اس حوالے سے آئی ایم ایف کی جانب سے پاکستان کو تجاویز فراہم کی جائیں گی۔

(جاری ہے)

ذرائع کا کہنا ہے کہ متعلقہ حکام نے آئندہ بجٹ کے لیے موسمیاتی تبدیلی سے متعلق عوامی سرمایہ کاری کے انتظام کی تشخیص کے لیے دستاویزات تیار کی ہیں جو آئی ایم ایف اور عالمی بینک کی پالیسی مشوروں کے مطابق ہیں، آئی ایم ایف کی جانب سے پاکستان کو مشورہ دیا گیا ہے کہ وہ موسمیاتی مزاحمت اور موافقت کے لیے اپنی مجموعی قومی پیداوار (جی ڈی پی) کا ایک فیصد سالانہ سرمایہ کاری کرے تاکہ موسمیاتی تبدیلیوں کے منفی اثرات سے نمٹا جا سکے اور اقتصادی ترقی کو برقرار رکھا جا سکے، اس طرح کی سرمایہ کاری سے قدرتی آفات کے جھٹکوں کے منفی اثرات کو ایک تہائی تک کم کیا جا سکتا ہے اور معیشت کی تیز تر بحالی ممکن ہے۔