ایس ای سی پی میں فروری 2025 میں 3,046 نئی کمپنیوں کی رجسٹریشن میں اضافہ

کراچی (اُردو پوائنٹ اخبارتازہ ترین - این این آئی۔ 11 مارچ2025ء) سیکیورٹیز اینڈ ایکسچینج کمیشن آف پاکستان نے فروری 2025 میں 3,046 نئی کمپنیوں کی رجسٹریشن کی۔ اس کے ساتھ ملک میں رجسٹرڈ کمپنیوں کی کل تعداد 246,608 تک پہنچ گئی، جو پاکستان کے کارپوریٹ سیکٹر پر بڑھتے ہوئے اعتماد کی عکاسی کرتی ہے۔تقریبا % 99.9 نئی کمپنیوں کی رجسٹریشن اب ڈیجیٹل طور پر مکمل کی جا رہی ہے، جو کمیشن کی جانب سے ایک اور اہم پیش رفت ہے۔

یہ اقدام پاکستان میں شفافیت کو فروغ دینے اور کاروبار میں آسانی فراہم کرنے کے لیے ٹیکنالوجی پر مبنی ریگولیٹری ماحول کی حمایت کے عزم کا عکاس ہے۔نئی رجسٹریشن میں 58فیصد حصہ پرائیویٹ لمیٹڈ کمپنیوں کا رہا، جبکہ 39فیصد سنگل ممبر کمپنیاں تھیں، جو پچھلے ماہ کے مقابلے میں 1فیصد اضافہ ظاہر کرتی ہیں۔

(جاری ہے)

باقی 3فیصد میں پبلک ان لسٹڈ کمپنیاں، غیر منافع بخش تنظیمیں، تجارتی تنظیمیں، اور لمیٹڈ لائبیلٹی پارٹنرشپ (LLPs) شامل ہیں۔

اس کے علاوہ، 3 غیر ملکی کمپنیوں نے بھی پاکستان میں اپنا کاروباری مرکز قائم کیا ہے۔مختلف شعبوں میں نمایاں ترقی دیکھنے میں آئی، جہاں کئی صنعتوں میں بھرپور سرگرمیاں جاری رہیں۔ انفارمیشن ٹیکنالوجی (آئی ٹی)اور ای کامرس کے شعبوں میں سب سے زیادہ اضافہ ہوا، جہاں 635 نئی کمپنیاں رجسٹر ہوئیں۔ اس کے بعد تجارتی شعبے میں 389، سروسز میں 379، جبکہ رئیل اسٹیٹ ڈویلپمنٹ اور کنسٹرکشن میں 296 نئی کمپنیاں رجسٹر کی گئیں۔

سیاحت اور ٹرانسپورٹ کے شعبے میں 165، خوراک اور مشروبات میں 139، تعلیم میں 104، مارکیٹنگ اور اشتہارات میں 78، مائننگ اور قوارنگ میں 76، ٹیکسٹائل میں 75، انجینئرنگ میں 67، جبکہ کارپوریٹ ایگریکلچرل فارمنگ، کاسمیٹکس اور ٹوائلٹریز، اور فیول و انرجی کے ہر ایک شعبے میں 56 نئی کمپنیاں رجسٹر ہوئیں۔ دیگر شعبوں نے بھی 475 نئی کمپنیوں کے اضافے میں حصہ ڈالا۔

کارپوریٹ سیکٹر میں غیر ملکی سرمایہ کاری میں بھی اضافہ دیکھنے میں آیا، جہاں 53 نئی کمپنیوں کو بین الاقوامی سرمایہ کاروں سے سرمایہ موصول ہوا۔آگے بڑھتے ہوئے، ایس ای سی پی اپنے ڈیجیٹل انفراسٹرکچر کو مزید بہتر بنانے اور کاروباری عمل کو مزید آسان بنانے کے لیے پرعزم ہے، تاکہ کاروباری مواقع کو فروغ دیا جا سکے، سرمایہ کاری کو متوجہ کیا جا سکے، رجسٹریشن کے عمل کو تیز کیا جا سکے اور پائیدار اقتصادی ترقی کو یقینی بنایا جا سکے۔