بیرسٹرسلطان سے چیف سیکرٹری فلائٹ لیفٹیننٹ (ر) خوشحال خان کی تفصیلی ملاقات

آزادکشمیرمیں جاری ترقیاتی پروجیکٹس اور دیگر امورکے حوالے سے تفصیلی بریفنگ دی گئی

جمعرات 13 مارچ 2025 21:42

مظفرآباد (اُردو پوائنٹ اخبارتازہ ترین - این این آئی۔ 13 مارچ2025ء)صدرریاست آزاد جموں وکشمیر بیرسٹر سلطان محمود چوہدری سے چیف سیکرٹری آزادکشمیر فلائٹ لیفٹیننٹ (ریٹائرڈ) خوشحال خان کی ایوان صدر مظفرآباد میں تفصیلی ملاقات۔ اس موقع پر چیف سیکرٹری آزادکشمیرفلائٹ لیفٹیننٹ (ریٹائرڈ) خوشحال خان نے صدر آزادکشمیر بیرسٹر سلطان محمود چوہدری کو آزادکشمیرمیں جاری ترقیاتی پروجیکٹس اور دیگر امورکے حوالے سے تفصیلی بریفنگ دی۔

اس موقع پر صدر آزادکشمیر بیرسٹر سلطان محمود چوہدری نے چیف سیکرٹری آزادکشمیر کو ہدایت کی کہ آزادکشمیرمیں گڈ گورننس کے قیام کے لئے کوئی دقیقہ فروگزاشت نہ رکھی جائے اور اس سلسلے میں تمام تر توانائیاں بروئے کار لائی جائیں تاکہ اس کے ثمرات عام آدمی تک پہنچ سکیں۔

(جاری ہے)

اس موقع پر صدر آزاد جموں وکشمیر بیرسٹر سلطان محمود چوہدری نے چیف سیکرٹری آزادکشمیر فلائٹ لیفٹیننٹ (ریٹائرڈ) خوشحال خان کو ریڈ کریسنٹ آزاد کشمیر اسٹیٹ برانچ کی عمارت کے لئے اراضی کی فراہمی کے لئے بھی ہدایات دیں اور کہا کہ ریڈ کریسنٹ آزادکشمیر اسٹیٹ برانچ کو اراضی جلد فراہم کی جائے تاکہ آزادکشمیر میں ریڈ کریسنٹ سوسائٹی بااحسن طریقے سے اپنا کام سر انجام دے سکے۔

اس موقع پر صدر آزادکشمیر بیرسٹر سلطان محمود چوہدری اور چیف سیکرٹری آزادکشمیر فلائٹ لیفٹیننٹ (ریٹائرڈ) خوشحال خان کے درمیان باہمی دلچسپی سمیت دیگر امور پر بھی تبادلہ خیال کیا گیا۔