ایس ای سی پی کا کانسپٹ نوٹ جاری ،این بی ایف سی کمپنیوں کے فریم ورک میں ترامیم کی تجویز

بدھ 19 مارچ 2025 18:00

اسلام آباد (اُردو پوائنٹ اخبارتازہ ترین - اے پی پی۔ 19 مارچ2025ء) سکیورٹیز اینڈ ایکسچینج کمیشن آف پاکستان (ایس ای سی پی) نے ایک کانسپٹ نوٹ جاری کیا ہے جس میں این بی ایف سی کمپنیوں کے فریم ورک میں ترامیم کی تجویز دی گئی ہے، ان مجوزہ تبدیلیوں کا مقصد این بی ایف سی سروسز کو این بی ایف سی فریم ورک کے اندر ایک منفرد کاروباری شکل کے طور پر متعارف کرانا ہے تاکہ مائیکروفنانس سے وابستہ اداروں کے لئے وضاحت فراہم کی جا سکے۔

ایس ای سی پی سے جاری پریس ریلیز کے مطابق مجوزہ ترامیم کا مقصد این بی ایف سی کے وسیع ڈھانچے کے تحت مائیکروفنانس سروسز کے لئے ایک واضح اور منفرد ریگولیٹری فریم ورک قائم کرنا ہے۔ نان بینکنگ مائیکروفنانس سروسز کو ایک علیحدہ کیٹگری کے طور پر تسلیم کرنے سے کمیشن کو ایسے مخصوص ضوابط متعارف کرانے میں مدد ملے گی جو مائیکروفنانس اداروں کی منفرد ضروریات کو بہتر طریقے سے پورا کر سکیں۔

(جاری ہے)

یہ تفریق نہ صرف تعمیلی عمل کو آسان بنائے گی اور ریگولیٹری پیچیدگیوں کو کم کرے گی بلکہ مائیکروفنانس اداروں کو اس قابل بھی بنائے گی کہ وہ کمزور اور غیر مستفید طبقات کی موثر انداز میں خدمت کر سکیں۔سرمایہ کاری فنانس سروسز، صرف ڈیجیٹل ماڈل، اور مائیکروفنانس لائسنسوں کے درمیان پایا جانے والا اشتراک لازمی تقاضوں اور عملی دائرہ کار کے اطلاق کے حوالے سے ابہام پیدا کرتا ہے۔

جیسے جیسے ڈیجیٹل قرضہ دینے کا رجحان بڑھ رہا ہے، یہ ضروری ہوتا جا رہا ہے کہ ریگولیٹری ڈھانچے میں مائیکروفنانس سروسز کو واضح طور پر الگ کیا جائے، تاکہ ان دونوں قرضہ جاتی شعبوں کی منفرد ضروریات کو بہتر طور پر پورا کیا جا سکے۔ایس ای سی پی نے متعلقہ فریقین کو ترغیب دی ہے کہ وہ کانسپٹ نوٹ کا جائزہ لیں اور مجوزہ ترامیم پر رائے دیں تاکہ ریگولیٹری ڈھانچے کو شعبے کی ضروریات کے مطابق مزید بہتر بنایا جا سکے۔