ایچ ای سی نے علامہ اقبال اوپن یونیورسٹی اورورچوئل یونیورسٹی کے طلبہ و طالبات کوبھی لیپ ٹاپ سکیم میں شامل کرلیا

ہفتہ 22 مارچ 2025 16:08

اسلام آباد (اُردو پوائنٹ اخبارتازہ ترین - اے پی پی۔ 22 مارچ2025ء) ہائر ایجوکیشن کمیشن (ایچ ای سی)نے علامہ اقبال اوپن یونیورسٹی اور ورچوئل یونیورسٹی کے طلبہ و طالبات کو بھی لیپ ٹاپ سکیم میں شامل کرلیا ہے۔ یہ اقدام فاصلاتی نظامِ تعلیم سے وابستہ طلبہ کو جدید ٹیکنالوجی سے ہم آہنگ کرنے اور ڈیجیٹل لرننگ کو فروغ دینے کے لیے اٹھایا گیا ہے۔اس سکیم کے تحت مستحق اور میرٹ پر پورا اترنے والے طلبہ کو لیپ ٹاپ فراہم کیے جائیں گے تاکہ وہ اپنی تعلیمی سرگرمیوں کو مزید مؤثر اور سہل بنا سکیں۔

یہ نہ صرف طلبہ کی تعلیمی صلاحیتوں میں نکھار پیدا کرے گا بلکہ انہیں عالمی معیار کی آن لائن تعلیم کے مواقع بھی فراہم کرے گا۔طلبہ کو ہدایت کی گئی ہے کہ وہ مزید تفصیلات اور درخواست دینے کے طریقہ کار کے لیے ہائر ایجوکیشن کمیشن کی آفیشل ویب سائٹ یا اپنی متعلقہ جامعات سے فوری رابطہ کریں۔

(جاری ہے)

اس اہم اقدام پر اپنے خیالات کا اظہار کرتے ہوئے علامہ اقبال اوپن یونیورسٹی کے وائس چانسلر اور ورچوئل یونیورسٹی کے قائم مقام ریکٹر، پروفیسر ڈاکٹر ناصر محمود نے اس فیصلے کو تعلیمی انقلاب کی طرف ایک مثبت قدم قرار دیا اور ہائر ایجوکیشن کمیشن کا شکریہ ادا کیا۔

انہوں نے مزید کہا کہ یہ سکیم طلبہ کے لیے جدید تعلیمی سہولیات کی فراہمی کو یقینی بنانے میں سنگِ میل ثابت ہوگی۔یہ لیپ ٹاپ سکیم نہ صرف تعلیمی معیار کو بہتر بنائے گی بلکہ طلبہ کے لیے ایک روشن اور کامیاب مستقبل کی راہ بھی ہموار کرے گی۔