وزیر برائے ریلوے کی آئی آئی ایم سی ٹی ریلوے جنرل ہسپتال کے ڈاکٹروں کے وفد سے ملاقات، مختلف امورپر غور

منگل 25 مارچ 2025 17:59

اسلام آباد(اُردو پوائنٹ اخبارتازہ ترین - این این آئی۔ 25 مارچ2025ء)وفاقی وزیر برائے ریلوے حنیف عباسی نے اپنے دفتر میں آئی آئی ایم سی ٹی ریلوے جنرل ہسپتال کے ڈاکٹروں کے وفد سے ملاقات کی۔ اس ملاقات کا مقصد وزیر ریلوے کو وزارت کا چارج سنبھالنے پر مبارکباد دینا تھا۔ملاقات کے دوران ایک خوشگوار اور گرم جوش گفتگو ہوئی جس میں ڈاکٹروں نے حنیف عباسی کو وزارت کا چارج سنبھالنے پر دلی مبارکباد پیش کی اور ریلوے کے صحت کے شعبے میں مزید تعاون کے عزم کا اظہار کیا۔

وفاقی وزیر حنیف عباسی نے ڈاکٹروں کے وفد کا شکریہ ادا کرتے ہوئے کہا کہ صحت کی سہولتوں کو مزید بہتر بنانے کے لیے ریلوے کے ہسپتالوں میں جدید سہولتوں کا اضافہ کیا جائے گا۔ وزیر نے اس عزم کا بھی اظہار کیا کہ ڈاکٹروں کی پیشہ ورانہ خدمات کو سراہا جائے گا اور ان کی فلاح و بہبود کے لیے ضروری اقدامات کیے جائیں گے۔

(جاری ہے)

اس ملاقات کے دوران وزیر ریلوے نے ہسپتال کی موجودہ حالت اور وہاں مریضوں کو فراہم کی جانے والی علاج کی سہولتوں کے بارے میں بھی سوالات کیے۔

ڈاکٹروں نے وزیر کو ہسپتال میں جاری علاج معالجے کے مختلف پہلوؤں پر تفصیل سے آگاہ کیا۔وفد نے وزیر ریلوے کو دعوت دی کہ وہ اپنے مناسب وقت پر آئی آئی ایم سی ٹی ریلوے جنرل ہسپتال کا دورہ کریں تاکہ وہ ہسپتال کی سہولتوں اور خدمات کا براہ راست معائنہ کر سکیں۔ وزیر ریلوے نے اس دعوت کو پذیرائی دیتے ہوئے دورے کے لیے جلدی وقت دینے کی یقین دہانی کرائی۔وفد میں اسد اللہ خان، ایگزیکٹو ڈائریکٹر آئی آئی ایم سی ٹی، عزیز الرحمن، چیف آپریشن آفیسر آئی آئی ایم سی ٹی، اور ڈاکٹر عمر، ڈائریکٹر تدریسی ہسپتال آئی آئی ایم سی ٹی شامل تھے۔