ریا چکرورتی سے میڈیا معافی مانگے، دیا مرزا کا مطالبہ

منگل 25 مارچ 2025 21:20

ممبئی (اُردو پوائنٹ اخبارتازہ ترین - آن لائن۔ 25 مارچ2025ء) بھارتی اداکارہ دیا مرزا نے سشانت سنگھ راجپوت کی موت کے کیس میں ریا چکرورتی سے میڈیا کے سلوک پر تنقید کی ہے۔بھارتی میڈیا رپورٹ کے مطابق دیا مرزا نے سینٹرل بیورو آف انویسٹی گیشن ( سی بی آئی)کے اداکار سشانت سنگھ راجپوت کی موت کے معاملے میں ریاچکرورتی اور ان کے خاندان کو کلیئر قرار دیے جانے پر ردعمل دیا ہے۔

برسوں کی قیاس آرائیوں اور شدید چھان بین کے بعد سی بی آئی نے نتیجہ اخذ کیا کہ 2020 میں ممبئی کے اپنے اپارٹمنٹ میں سشانت سنگھ راجپوت کی المناک موت کے پیچھے کسی بھی سازشی کھیل کے شواہد نہیں ملے ہیں۔ریا چکرورتی کو ستمبر 2020 میں نارکوٹکس کنٹرول بیورو (ین سی بی)نے اداکار کی موت سے منسلک منشیات کیس میں گرفتار کیا تھا۔

(جاری ہے)

اس معاملے پر اداکارہ دیا مرزا نے ردعمل دیا، انہوں نے سوشل میڈیا پر شیئر اسٹوری میں کہا کہ ریا چکرورتی سے میڈیا کو تحریری معافی مانگنی چاہیے۔

انہوں نے مزید کہا کہ میڈیا میں کون ہے جو اداکارہ اور اس کے خاندان سے تحریری معافی مانگی کیونکہ اس وقت آپ چڑیل کے شکار پر تھے، آپ نے سب کچھ ٹی آر پی کیلئے کیا۔اداکارہ نے یہ بھی کہا کہ میڈیا نے صرف ٹی آر پی کیلیے ہراساں اور پریشان کیا، اس لیے معافی مانگیں، یہ بہت کم ہے جو آپ کرسکتے ہیں۔یاد رہے کہ ریا چکرورتی نے گرفتاری کے بعد 27 دن جیل میں گزارے تھے۔