Live Updates

ظ*رکن قومی اسمبلی انجم عقیل خان کی وفاقی وزیرپروفیسر احسن اقبال سے اہم ملاقات

ٹ*حلقہ این اے 46 اسلام آباد سے متعلق ترقیاتی منصوبوں پر تبادلہ خیال اسلام آباد کو ایک ماڈل شہر بنانے کے لیے مربوط منصوبہ بندی اور بروقت عملدرآمد ناگزیر ہونے پر اتفاق

ہفتہ 5 اپریل 2025 19:55

nاسلام آباد(اُردو پوائنٹ اخبارتازہ ترین - آن لائن۔ 05 اپریل2025ء) رکن قومی اسمبلی انجم عقیل خان نے وفاقی وزیر پلاننگ اینڈ ڈویلپمنٹ پروفیسر چوہدری احسن اقبال سے اسلام آباد میں ایک تفصیلی ملاقات کی جس میں حلقہ این اے 46 اسلام آباد سے متعلق ترقیاتی منصوبوں پر تبادلہ خیال کیا گیا۔دونوں رہنماؤں نے اس بات پر اتفاق کیا کہ اسلام آباد کو ایک ماڈل شہر بنانے کے لیے مربوط منصوبہ بندی اور بروقت عملدرآمد ناگزیر ہے۔

ملاقات کے دوران انجم عقیل خان نے اپنے حلقے میں انفراسٹرکچر کی بہتری، تعلیم اور صحت کے شعبوں میں جاری اور مجوزہ منصوبہ جات کے لیے وفاقی بجٹ 2025-26 میں فنڈز مختص کرنے کی ضرورت پر زور دیا۔ انہوں نے کہا کہ اسلام آباد کے مضافاتی علاقوں کو ترقیاتی عمل میں مساوی اہمیت دی جانی چاہیے تاکہ عوام کو بنیادی سہولیات ان کی دہلیز پر میسر آ سکیں۔

(جاری ہے)

وفاقی وزیر احسن اقبال نے انجم عقیل خان کو یقین دہانی کرائی کہ وزارت منصوبہ بندی اسلام آباد میں جاری اور نئے ترقیاتی منصوبوں کے لیے بھرپور معاونت فراہم کرے گی۔ انہوں نے کہا کہ حکومت کا مقصد تمام علاقوں میں یکساں ترقی کو یقینی بنانا ہے، اور اس سلسلے میں عوامی نمائندوں کی تجاویز کو خصوصی اہمیت دی جا رہی ہے۔ملاقات میں حلقے میں سڑکوں کی تعمیر و بحالی‘* سرکاری اسکولوں کی اپگریڈیشن اور نئے تعلیمی اداروں کا قیام‘ بنیادی صحت کے مراکز کی بہتری‘ صاف پانی کی فراہمی اور سیوریج سسٹم کی بہتری‘ نوجوانوں کے لیے کھیلوں اور روزگار کے مواقع پیدا کرنے کے منصوبے سمیت دیگر منصوبوں پر گفتگو ہوئی ان میں شامل تھے۔

انجم عقیل خان نے وفاقی وزیر کا شکریہ ادا کیا اور امید ظاہر کی کہ آئندہ بجٹ میں ان کے حلقے کے لیے خاطر خواہ فنڈز مختص کیے جائیں گے تاکہ عوامی مسائل کا مؤثر حل ممکن ہو سکے ۔