ایس ای سی پی نے پرائیویٹ فنڈ سیکٹر سے متعلق عمومی سوالات جاری کر دیئے

منگل 8 اپریل 2025 18:25

اسلام آباد (اُردو پوائنٹ اخبارتازہ ترین - اے پی پی۔ 08 اپریل2025ء) سکیورٹی ایکسچینج کمیشن آف پاکستان (ایس ای سی پی )نے پرائیویٹ فنڈ سیکٹر کے بارے میں عمومی سوالات(FAQs) کا ایک سیٹ جاری کیا ہے، FAQs کا مقصد پرائیویٹ فنڈ سیکٹر کے اہم پہلوؤں کے بارے میں سٹیک ہولڈرز، سرمایہ کاروں اور عام لوگوں کو واضح اور جامع معلومات فراہم کرنا ہے۔ ایس ای سی پی سے منگل کو جاری پریس ریلیز کے مطابق یہ عمومی سوالات (FAQs) فنڈ منیجرز، سرمایہ کاروں اور دیگر سٹیک ہولڈرز کی رہنمائی کے لئے تیار کئے گئے ہیں تاکہ پرائیویٹ فنڈز کے لئے ریگولیٹری فریم ورک اور عملی تقاضوں کے بارے میں وضاحت فراہم کی جا سکے۔

یہ FAQs پرائیویٹ فنڈز کا تعارف، ان کی رجسٹریشن اور قیام کا طریقہ کار، گورننس اور انتظامی ڈھانچے، سرمایہ کاری اور عملی رہنما اصول، مالیاتی رپورٹنگ اور تعمیل کی ذمہ داریاں، پرائیویٹ فنڈ مینجمنٹ کمپنی کا کردار اور ذمہ داریاں، قیمتوں کے تعین کے طریقہ کار، اور لاگو ریگولیٹری فیسوں و ایکویٹی تقاضوں جیسے متعدد موضوعات کا احاطہ کرتے ہیں۔

(جاری ہے)

یہ عمومی سوالات (FAQs) پرائیویٹ فنڈ کی رجسٹریشن کی ضروریات اور اس سے متعلقہ دستاویزات کو بھی واضح کرتے ہیں تاکہ سٹیک ہولڈرز ایس ای سی پی کے ریگولیٹری تقاضوں کو بہتر طور پر سمجھ سکیں اور ان پر عملدرآمد آسان ہو جائے۔ ان FAQs کا مقصد ریگولیٹری سیاق و سباق کو آسان بنانا، عملی خدشات کا ازالہ کرنا، اور تمام متعلقہ معلومات کو ایک جگہ مجتمع کرنا ہےتاکہ شفافیت کو فروغ دیا جا سکے، ریگولیٹری پابندیوں کی پاسداری کو بڑھایا جا سکے، اور پاکستان میں پرائیویٹ فنڈ سیکٹر کی ترقی کو سہارا دیا جا سکے۔ FAQs اب ایس ای سی پی کی ویب سائٹ پر دستیاب ہیں اور درج ذیل لنک https://www.secp.gov.pk/?wpdmdl=56389&ind=1742977287491 سے ان تک رسائی حاصل کی جا سکتی ہے۔