الیکشن کمیشن میں نئے تعینات الیکشن افسران کی ٹریننگ کا آغاز

بدھ 9 اپریل 2025 17:36

اسلام آباد (اُردو پوائنٹ اخبارتازہ ترین - اے پی پی۔ 09 اپریل2025ء) الیکشن کمیشن نے 23 نئے تعینات الیکشن افسران کے لیے 13 ہفتوں پر مشتمل سروس ٹریننگ کا آغاز کر دیا ہے۔ ترجمان الیکشن کمیشن کی جانب سے جاری اعلامیہ کے مطابق الیکشن کمیشن اکیڈمی میں 9 اپریل سے شروع ہونے والے تربیتی پروگرام کا اختتام 4 جولائی 2025ء کو ہو گا۔چیف الیکشن کمشنر سکندر سلطان راجہ نے تربیتی پروگرام کا باقاعدہ افتتاح کیا جبکہ افتتاحی تقریب میں معزز ممبران الیکشن کمیشن بھی شریک ہوئے۔

چیف الیکشن کمشنر نے اپنے افتتاحی کلمات میں نئے افسران کو الیکشن کمیشن میں تعیناتی پر مبارکباد دی اور ان کا خیر مقدم کیا۔ انہوں نے افسران پر واضح کیا کہ ان کا انتخاب خالصتاً میرٹ کی بنیاد پر ہوا ہے اور اس پر ان کو فخر ہونا چاہئے۔

(جاری ہے)

انہوں نے کہا کہ انتخابات کا انعقاد ایک مشکل اور پیچیدہ عمل ہے۔ جس کے موثر انعقاد کیلئے آئین، قانون رولز اور کوڈ آف کنڈکٹ کی جانکاری اور عملی تجربہ ضروری ہے۔

انہوں نے کہا کہ تربیتی پروگرام میں آپ کو انتخابی قوانین، حلقہ بندیوں، ووٹر رجسٹریشن، پولنگ کے طریقہ کار و دیگر دفتری امور کی انجام دہی سے متعلق تربیت دی جائے گی اور جہاں تک ممکن ہو گا عملی تجربات و مظاہرہ جات بھی کروائے جائیں گے۔ مزید یہ کہ تربیت کے دوران افسران کو جدید ٹیکنالوجی کے استعمال کے متعلق بھی آگاہی فراہم کی جائے گی تاکہ دوران سروس اور عملی زندگی میں ٹیکنالوجی کو استعمال کر سکیں۔ اپنے اختتامی کلمات میں چیف الیکشن کمشنر نے نئے افسران کو قوم کی خدمت، آئین وقانون کے مطابق سرکاری امور کی انجام دہی اور عوام کے ساتھ خوش اخلاقی سے پیش آنے کی تلقین کی اور ٹریننگ پر توجہ مذکور کرنے پر بھی زور دیا۔