بھارتی باکسنگ آئیکون میری کوم اور ان کے شوہر کارونگ اونکھولر المعروف آنلر کی علیحدگی کی خبریں گردش کرنے لگیں

جمعرات 10 اپریل 2025 19:51

ممبئی (اُردو پوائنٹ اخبارتازہ ترین - این این آئی۔ 10 اپریل2025ء)بھارتی باکسنگ آئیکون میری کوم اور ان کے شوہر کارونگ اونکھولر المعروف آنلر کی علیحدگی کی خبریں گردش کرنے لگیں۔بھارتی میڈیا پورٹس کے مطابق میری کوم اور ان کے شوہر کارونگ اونکھولر کو مبینہ طور پر ازدواجی مشکلات کا سامنا ہے، دونوں الگ رہ رہے ہیں۔میڈیا پورٹس کے مطابق ذرائع نے بتایا کہ آنلر کے 2022ء کے انتخابات میں ہارنے کے بعد مالی نقصانات پر اختلافات پیدا ہونے کے سبب ان کے درمیان علیحدگی ہوئی ہے۔

(جاری ہے)

مبینہ طور پر میری کوم شوہر سے اختلافات کے بعد اپنے 4 بچوں کے ساتھ فرید آباد چلی گئی ہیں، جہاں انہیں نئی محبت مل گئی ہے، جبکہ آنلر اپنے والدین کے ساتھ نئی دہلی میں رہ رہے ہیں۔میڈیا پورٹس کے مطابق ایک ساتھی باکسر نے کہا کہ میری کوم اور آنلر کی علیحدگی کی افواہیں محض افواہیں نہیں ہو سکتیں۔انہوںنے کہاکہ ہر کوئی میری میڈم کے حوالے سے یہی باتیں کر رہا ہے کہ ان کے کسی دوسرے باکسر کے شوہر کے ساتھ تعلقات ہیں، ان کی حالیہ انسٹاگرام پوسٹس سے ان قیاس آرائیوں کو مزید تقویت ملی ہے جن میں انہوں نے مذکورہ شخص کو اپنے کاروباری شراکت دار کے طور پر متعارف کروایا ہے۔