عمران خان کی بچوں سے فون پر بات چیت، طبی معائنے کی درخواستیں منظور

منگل 15 اپریل 2025 20:15

اسلام آباد(اُردو پوائنٹ اخبارتازہ ترین - این این آئی۔ 15 اپریل2025ء) اسلام آباد کی عدالت نے بانی تحریکِ انصاف کی بچوں سے فون پر بات چیت اور طبی معائنے کی درخواستوں پر فیصلہ سنا دیا۔اسلام آباد کے اسپیشل جج سینٹرل شاہ رخ ارجمند نے بانی پی ٹی آئی کی دونوں درخواستیں منظور کر لیں۔

(جاری ہے)

عدالت نے اپنے حکم نامے میں کہا ہے کہ رواں اور گزشتہ سال جیل حکام کو بانی پی ٹی آئی کی ہفتہ وار بچوں سے وٹس ایپ پر بات کروانے کا حکم دیا تھا۔

عدالتی حکم نامے میں کہا گیا ہے کہ اڈیالہ جیل کے سپرنٹنڈنٹ عدالتی احکامات پر عمل درآمد کریں، 28 اپریل کو جیل حکام واٹس ایپ کال سے متعلق تعمیلی رپورٹ عدالت میں جمع کروائیں۔عدالت نے حکم دیتے ہوئے یہ بھی کہا ہے کہ جیل میں موجود ڈاکٹرز کی موجودگی میں بانی? پی ٹی آئی کے ذاتی ڈاکٹرز کو طبی معائنہ کرنے دیا جائے، طبی معائنے سے متعلق تعمیلی رپورٹ 28 اپریل کو عدالت میں جمع کروائی جائے۔