آئی پی ایل میں غیرقانونی سرگرمیوں کی گونج شروع ہوگئی

بھارتی کرکٹ بورڈ سے ٹیم مالکان، کھلاڑیوں، کوچز، ٹیم آفیشلز، سپورٹ اسٹاف اور کمنٹیٹرز کووارننگ

جمعرات 17 اپریل 2025 14:29

نئی دہلی (اُردو پوائنٹ اخبارتازہ ترین - این این آئی۔ 17 اپریل2025ء)بھارتی کرکٹ لیگ آئی پی ایل میں غیرقانونی سرگرمیوں کی گونج شروع ہوگئی، بھارتی کرکٹ بورڈ نے اس حوالے سے الرٹ بھی جاری کردیا۔ بھارتی میڈیا کے مطابق بی سی سی آئی نے ٹیموں کو وارننگ جاری کی ہے کہ ممکنہ طور پر کاروباری شخصیت آئی پی ایل سے متعلقہ لوگوں کو پھنسا سکتی ہے۔بھارتی کرکٹ بورڈ نے ٹیم مالکان، کھلاڑیوں، کوچز، ٹیم آفیشلز، سپورٹ اسٹاف اور کمنٹیٹرز کو خبردار کر دیا۔

آئی پی ایل اینٹی کرپشن سیکیورٹی یونٹ کا کہنا ہے کہ حیدرآباد دکن سے تعلق رکھنے والی کاروباری شخصیت لیگ میں ملوث افراد کے ساتھ دوستی بڑھا سکتی ہے۔بھارتی میڈیا کے مطابق متعلقہ کارورباری شخصیت کے تعلقات بکیز کے ساتھ ہیں اور ماضی میں کرپٹ سرگرمیوں میں ملوث رہی ہے۔

(جاری ہے)

آئی پی ایل اینٹی کرپشن سیکیورٹی یونٹ نے کاروباری شخصیت کے ساتھ کسی بھی قسم کے تعلق کو رپورٹ کرنے کی ہدایت کی ہے۔

بھارتی میڈیا کا کہنا ہے کہ اینٹی کرپشن سیکیورٹی یونٹ کی تمام ٹیموں اور کھلاڑیوں کو محتاط رہنے کی ہدایت کی گئی ہے۔ میڈیا رپورٹ میں بتایا گیا کہ مشکوک شخص اپنے ہدف کو مہنگے تحفے اور جیولری کا لالچ دے کر پھنساتا ہے۔ مذکورہ کاروباری شخص پرائیویٹ پارٹیز میں بلانے اور ٹیم ممبرز کے فیملیز کو گفٹ دینے کی کوشش کر رہا ہے، مذکورہ شخص آئی پی ایل میں شامل افراد کے قریب آنے کی کوشش کر رہا ہے، اسے ٹیم ہوٹلز اور میچز کے دوران دیکھا گیا ہے۔