لاہور چیمبر میں ایف ٹی او ایڈوائزری کمیٹی کا اجلاس اور آگاہی سیمینار

لاہور (اُردو پوائنٹ اخبارتازہ ترین - آن لائن۔ 17 اپریل2025ء) وفاقی ٹیکس محتسب سیکرٹریٹ کی ایڈوائزری کمیٹی کا اعلیٰ سطحی اجلاس اور آگاہی سیمینار لاہور چیمبر آف کامرس اینڈ انڈسٹری جس کا مقصد ٹیکس دہندگان اور ایف ٹی او کے دفتر کے درمیان روابط کو فروغ دینا، شفافیت کو یقینی بنانا اور ملک میں ایک منصفانہ، مؤثر ٹیکس نظام کے قیام کی راہ ہموار کرنا تھا۔

اجلاس اور سیمینار کی مشترکہ صدارت وفاقی ٹیکس محتسب آصف محمود جاہ اور لاہور چیمبر کے صدر میاں ابوزر شاد نے کی۔ اس موقع پر ایف ٹی او سیکرٹریٹ کے سینئر افسران، فیڈرل بورڈ آف ریونیو کے نمائندگان، لاہور چیمبر کی ایگزیکٹو کمیٹی کے اراکین، ممتاز کاروباری شخصیات، ٹیکس ماہرین اور سول سوسائٹی کے نمائندگان بھی موجود تھے۔

(جاری ہے)

اپنے خطاب میں آصف محمود جاہ نے کہا کہ ایف ٹی او کا ادارہ ٹیکس دہندگان کے حقوق کے تحفظ اور ٹیکس نظام میں بدانتظامی سے متعلق شکایات کے فوری، شفاف اور غیرجانبدارانہ حل کے لیے پرعزم ہے۔

انہوں نے بتایا کہ ان کے دفتر نے مختلف اقدامات شروع کیے ہیں جن میں ملک بھر کے تجارتی چیمبرز میں ایڈوائزری کمیٹیوں کا قیام، آگاہی پروگرامز اور آن لائن شکایات کے اندراج کے لیے ڈیجیٹل پلیٹ فارمز شامل ہیں۔ انہوں نے کہا کہ پاکستان کی کاروباری برادری ملکی معیشت کی ترقی میں ریڑھ کی ہڈی کی حیثیت رکھتی ہے اور ایف ٹی او کا دفتر ان کے مسائل کے حل کے لیے ہر ممکن تعاون فراہم کر رہا ہے۔

انہوں نے ٹیکس دہندگان پر زور دیا کہ وہ انصاف اور شفافیت کے فروغ کے لیے محتسب کے پلیٹ فارم سے بھرپور استفادہ کریں۔لاہور چیمبر کے صدر میاں ابوزر شاد نے اپنے خطاب میں ایف ٹی او کے کردار کو سراہتے ہوئے کہا کہ ان کا ادارہ کاروباری برادری کی آواز بن کر سامنے آیا ہے۔ انہوں نے کہا کہ ایف ٹی او کی کوششیں ٹیکس حکام اور ٹیکس دہندگان کے درمیان اعتماد سازی میں اہم کردار ادا کر رہی ہیں۔

انہوں نے کہا کہ ایسے اجلاس اور سیمینارز ٹیکس نظام کو بہتر بنانے اور شکایات کے فوری حل کی راہ ہموار کرتے ہیں۔انہوں نے زور دیا کہ ایف ٹی او کے فیصلوں پر مؤثر عملدرآمد کو یقینی بنایا جائے اور شکایات درج کروانے کے طریقہ کار کو مزید آسان بنایا جائے تاکہ چھوٹے اور درمیانے درجے کے کاروباری افراد بھی بغیر کسی ہچکچاہٹ کے اس سہولت سے فائدہ اٹھا سکیں۔