محکمہ تعلیم (پیکٹا)کی 4روزہ انٹرنیشنل ورکشاپ اختتام پذیر

بین الاقوامی ماہرین تعلیم کی شرکت، گلوبل سٹیزن شپ ان ایجوکیشن پر ٹریننگ دی

جمعرات 17 اپریل 2025 19:45

لاہور (اُردو پوائنٹ اخبارتازہ ترین - این این آئی۔ 17 اپریل2025ء)محکمہ تعلیم (پیکٹا)کی گلوبل سٹیزن شپ ان ایجوکیشن کے موضوع پر جاری انٹرنیشنل لیول کی 4روزہ ورکشاپ اختتام پذیر ہو گئی۔ ورکشاپ میں شرکا کو نصاب سازی سمیت دیگر متعلقہ امور پر بین الاقوامی ماہرین تعلیم کی جانب سے ٹریننگ دی گئی۔ اختتامی تقریب سے گفتگو کرتے ہوئے وزیر تعلیم رانا سکندر حیات، چیف ایگزیکٹو آفیسر پیکٹا ڈاکٹر شہنشاہ فیصل عظیم، پارلیمانی سیکریٹری نوشین عدنان، سیکرٹری اسکول ایجوکیشن خالد نظیر وٹو و دیگر نے کہا کہ دنیا ایک گلوبل ویلج بن چکی ہے۔

پاکستان جیسے ترقی پذیر ممالک کو گلوبلائزیشن جیسے مشترکہ چیلنجز کا سامنا ہے۔ ان حالات میں گلوبل سٹیزن شپ ان ایجوکیشن کو فروغ دینا اہمیت اختیار کر چکا ہے۔

(جاری ہے)

رانا سکندر حیات اور ڈاکٹر شہنشاہ فیصل عظیم نے جنوبی کوریا، آسٹریلیا، فلپائن اور دیگر ممالک سے آئے ہوئے تعلیمی ماہرین سے اظہار تشکر کرتے ہوئے مزید کہا کہ وزیر اعلی پنجاب مریم نواز شریف کے وژن کے تحت تعلیمی اصلاحات کے لیے تعلیم میں ٹیکنالوجی کے انضمام اور کم وسائل رکھنے والے طلبا کے لیے وظائف جیسے جاری اقدامات کئے جا رہے ہیں۔

ورکشاپ میں بین الاقوامی ماہرین جونگمن اوم (ڈپٹی ہیڈ، IGCED, APCEIU) پروفیسر کیون کیسٹر (سیئول نیشنل یونیورسٹی)، ڈاکٹر ایسٹر کیئر (یونیورسٹی آف میلبورن)اور لیا ایسپالارڈو شامل تھے جنہوں نے شرکا کو تدریسی سرگرمیاں موثر طریقے سے ادا کرنے کے ضمن میں عملی مہارات فراہم کیں۔ اس موقع پر وزیر تعلیم نے شرکاء میں اسناد اور بین الاقوامی ماہرین تعلیم میں یادگاری تحائف بھی تقسیم کئے۔