ٹیکسٹائلز کی قومی برآمدات میں رواں مالی سال کے دوران 9.48 فیصد اضافہ

جمعہ 18 اپریل 2025 13:33

اسلام آباد (اُردو پوائنٹ اخبارتازہ ترین - اے پی پی۔ 18 اپریل2025ء) ٹیکسٹائلز کی قومی برآمدات میں رواں مالی سال کے دوران 9.48 فیصد اضافہ ہوا ہے۔ ادارہ برائے شماریات پاکستان (پی بی ایس)کے اعداد وشمار کے مطابق رواں مالی سال کے پہلے نوماہ میں جولائی 2024 تا مارچ 2025 کے دوران برآمدات کی مالیت 13.62 ارب ڈالر تک پہنچ گئی جبکہ جبکہ گذشتہ مالی سال کے اسی عرصہ میں ٹیکسٹائلز کی برآمدات سے 12.44 ارب ڈالر زرمبادلہ کمایا گیا تھا ۔

اس طرح گذشتہ مالی سال کے مقابلہ میں رواں مالی سال کے پہلے نو مہینوں کے دوران ٹیکسٹائلز کی ملکی برآمدات میں 1.18 ارب ڈالر یعنی 9.48 فیصد کی بڑھوتری ریکارڈ کی گئی ہے ۔ پی بی ایس کی رپورٹ کےمطابق مارچ 2025 میں برآمدات میں10 فیصد کی شرح نمو سے برآمدات کی مالیت 1.30 ارب ڈالر کے مقابلہ میں 1.43 ارب ڈالر تک پہنچ گئی ۔

(جاری ہے)

واضح رہے کہ رواں مالی سال میں اگست 2024 کے دوران ٹیکسٹائلز کی برآمدات میں 13 فیصد ، ستمبر میں 17.92 فیصد ، اکتوبر میں 13.11 فیصد ، نومبر 10.81 فیصد ، دسمبر 5.55 فیصد جبکہ جنوری 2025 میں 15.85 فیصد اور فروری میں ٹیکسٹائلز کی برآمدات میں 9.31 فیصد کی شرح نمو ریکارڈ کی گئی تھی ۔

پی بی ایس کی رپورٹ کے مطابق گذشتہ مالی سال کے مقابلہ میں رواں مالی سال کے دوران ریڈی میڈ گارمنٹس کی ملکی برآمدات میں 19.05 فیصد کی نمایاں شرح نمو ریکارڈ کی گئی ہے جبکہ نیٹ ویئر ز کی برآمدات میں 16.82 فیصد اور تولیہ کی برآمدات میں 4.46 فیصد کا اضافہ ہوا ہے ۔ اس طرح سوتی کپڑے کی برآمدات میں بھی 0.11 فیصد کی بڑھوتری ریکارڈ کی گئی ہے ۔دوسری جانب رواں مالی سال کےد وران دھاگے کی برآمدات میں 32.1 فیصد کی کمی واقع ہوئی ہے ۔ \395