پشاور میں 150 گرام وزنی روٹی کی قیمت 20روپے اور 250 گرام روٹی کی قیمت 30 روپے مقرر دی دی گئی

جمعہ 18 اپریل 2025 22:28

پشاور (اُردو پوائنٹ اخبارتازہ ترین - اے پی پی۔ 18 اپریل2025ء) پشاور میں 150 گرام وزنی روٹی کی قیمت 20روپے اور 250 گرام روٹی کی قیمت 30 روپے مقرر دی دی گئی، ضلعی انتظامیہ نے روٹی کی قیمتوں کا نیا نرخ نامہ جاری کر دیا ہے جو فوری طور پر نافذ العمل ہوگا۔ اعلامیے میں تمام نانبائیوں کو ہدایت کی گئی ہے کہ وہ مقرر کردہ نرخ نامہ تندور کے باہر نمایاں جگہ پر آویزاں کریں تاکہ عوام کو قیمتوں سے آگاہی حاصل ہو سکے ، یہ بھی واضح کیا گیا ہے کہ نانبائی مقررہ وزن اور نرخ سے تجاوز نہ کریں بصورت دیگر ان کے خلاف سخت قانونی کارروائی عمل میں لائی جائے گی۔

نیا نرخ نامہ پشاور کینٹ، حیات آباد، سمیت ضلع بھر میں نافذ العمل ہوگا اور کسی بھی علاقے یا نانبائی کو نرخ اور وزن کے ضمن میں کسی قسم کی رعایت یا استثنیٰ کی اجازت نہیں دی جائے گی۔

(جاری ہے)

ضلعی انتظامیہ نے شہر بھر میں ڈبل روٹی کی فروخت پر بھی پابندی عائد کر دی ہے۔تمام تندور مالکان کو پابند کیا گیا ہے کہ وہ تندور پر ڈیجیٹل ترازو لازمی رکھیں تاکہ صارفین روٹی کا وزن خود چیک کر سکیں، انتظامیہ کے مطابق اس اقدام کا مقصد صارفین کو منصفانہ قیمت پر معیاری وزن کی روٹی فراہم کرنا ہے۔ضلعی انتظامیہ نے نانبائیوں کو خبردار کیا ہے کہ نرخ نامے کی خلاف ورزی کرنے والوں کے خلاف سخت کارروائی کی جائے گی اور کسی کو عوامی مفاد سے کھیلنے کی اجازت نہیں دی جائے گی۔