صوبائی وزیر قانون نے گورنمنٹ مڈل سکول خواجہ پائیل کوہاٹ کی اپ گریڈیشن کا افتتاح کر دیا

پیر 21 اپریل 2025 02:20

۰ پشاور (اُردو پوائنٹ اخبارتازہ ترین - آن لائن۔ 21 اپریل2025ء)خیبر پختونخوا کے وزیر قانون، پارلیمانی امور و انسانی حقوق آفتاب عالم ایڈووکیٹ نے کوہاٹ کے یونین کونسل زیارت شیخ اللہ داد میں گورنمنٹ مڈل سکول کی ہائی لیول تک اپ گریڈیشن اور اس کی نئی عمارت کا باقاعدہ افتتاح کیا۔سابق وفاقی وزیر داخلہ اور پی ٹی آئی کے سینئر رہنما شہریارخان آفریدی ایم این اے اور چیئرمین تحصیل گمبٹ ساجد اقبال بھی موجود تھے ۔

33.19 ملین روپے کی لاگت سے تعمیر کی گئی سکول کی افتتاحی تقریب میں عمائدین علاقہ، اساتذہ کرام، مقامی پارٹی رہنماؤں، کارکنوں اورعوام نے بڑی تعداد میں شرکت کی۔ صوبائی وزیر قانون نے اپنے خطاب میں کہا کہ مذکورہ سکول پر کافی عرصے سے کام سست روی کا شکار تھا جس کیلئے شہریار آفریدی کی کاوشوں سے فنڈز کا انتظام کیا گیا ۔

(جاری ہے)

ان کا کہنا تھا کہ تعلیم ہر بچے کا بنیادی حق او ر ترقی و خوشحالی کا ضامن ہی. آفتاب عالم نے کہا کہ شہریار آفریدی کی قیادت میںتمام منتخب نمائندے کوہاٹ کی ترقی کیلئے کوشاں ہیں۔

انہوں نے کہا کہ تعلیم، صحت، مواصلات، پینے کا پانی، زراعت اور آبپاشی ان کی ترجیحات کے شعبے ہیں ۔حکومتی پالیسی کے مطابق جاری منصوبے جو تکمیل کے قریب ہیں، پہلے مکمل کئے جا رہے ہیں ۔ اگلے مرحلے میں ہر علاقے کی ضروریات کو مدنظر رکھتے ہوئے عوامی مشاورت سے منصوبے تیار کئے گئے ہیں جن کو بروقت مکمل کرنے کی بھرپور کوشش کریں گے۔ انہوں نے مزید کہا کہ وہ عوام کو ہر گز مایوس نہیں کریں گے اور ان کے توقعات پر پورا اتریں گے۔