حکومت کی جانب سے صنعتی شعبے کی بحالی کیلئے ریلیف پیکیج لانے کا اعلان کا خیر مقدم

پیر 21 اپریل 2025 22:21

لاہور (اُردو پوائنٹ اخبارتازہ ترین - آن لائن۔ 21 اپریل2025ء) سینئر ایگزیکٹو کمیٹی ممبر لاہور چیمبر آف کامرس اینڈ انڈسٹری علی عمران آصف نے وفاقی حکومت کی جانب سے صنعتی شعبے کی بحالی کیلئے ریلیف پیکیج لانے کے اعلان کا خیر مقدم کرتے ہوئے کہا ہے کہ پائیدار معیشت کیلئے کم از کم دس سالہ پالیسی تشکیل دینا ہوگی اور ا س پر پارلیمنٹ سے مہر ثبت کرائی جائے ،حکومت صنعتوں کے ٹیکس ریٹس میں کمی لائے اور مختلف محکموں کی جانب سے ناجائز ہراساں کرنے کا سلسلہ بھی روکا جائے ۔

اپنے بیان میں انہوں نے کہا کہ موجودہ حکومت کی جانب سے نجی بینکوں سے قرض لینے کی شرح میں کمی ہوئی ہے اس لئے نجی بینک اب قرضوں کا رخ صنعتوں کی طرف موڑیں ، مارک اپ کم سطح پر رکھنے کے لئے حکومت سبسڈی دے تاکہ ہماری پیداواری لاگت کم ہو سکے اور پاکستان عالمی منڈیوں میں حریف ممالک سے مقابلے کی دوڑ میں شامل ہو سکے ۔

(جاری ہے)

انہوں نے کہا کہ اسٹیک ہولڈرز کی مشاورت کے بغیر کوئی بھی پالیسی پائیدار نہیں ہو سکتی اس لئے ہر شعبے کے لئے فوکل پرسن مقرر کئے جائیں تاکہ حکومت اور کاروبار ی شعبوں میں مضبوط روابط قائم ہو سکیں ۔

علی عمران آصف نے کہا کہ حکومت کی جانب سے بجلی کی قیمتوں میں کمی سے صنعتوں کی ڈوبتی ہوئی نبض بحال ہوگی لیکن ابھی مزید ریلیف دینا ہو گا جس سے ہماری مجموعی گروتھ پر مثبت اثرات مرتب ہوں گے۔