ایف آئی اے سائبر کرائم ونگ کو خودمختار ادارے کی حیثیت حاصل،نیشنل سائبر کرائم انوسٹیگیشن ایجنسی قائم

منگل 22 اپریل 2025 18:10

اسلام آباد (اُردو پوائنٹ اخبارتازہ ترین - اے پی پی۔ 22 اپریل2025ء) وفاقی حکومت نے ایف آئی اے سائبر کرائم ونگ کو خودمختار ادارے کی حیثیت دیتے ہوئے نیشنل سائبر کرائم انوسٹیگیشن ایجنسی قائم کر دی ، اس ادارے کو ملک بھر میں سائبر کرائم کی روک تھام، تحقیقات اور کارروائیوں کے لیے مکمل اختیار حاصل ہوگا ۔ ترجمان ایف آئی اے کے مطابق یہ ادارہ آن لائن دھوکہ دہی، ہراسانی، ڈیجیٹل بلیک میلنگ، جعلی ویب سائٹس، شناخت کی چوری، سوشل میڈیا کرائم اور دیگر سائبر سرگرمیوں کے خلاف مؤثر اقدامات کرے گا۔

اس کے ساتھ ہی سائبر کرائمز کی تحقیقات اور شکایات کے لیے ایف آئی اے کا سائبر کرائم ونگ ختم کر دیا گیا ہے اور سائبر کرائمز سے متعلق تمام معاملات کے لیے نیشنل سائبر کرائم انوسٹیگیشن ایجنسی (این سی سی آئی اے)کوذمہ داری سونپی گئی ہے۔

(جاری ہے)

اب سائبر کرائمز کی تحقیقات اور شکایات کے لیے ایف آئی اے کے بجائے، عوام کو 'نیشنل سائبر کرائم انوسٹیگیشن ایجنسی' سے رابطہ کرنا ہوگا۔

عوام الناس سے گزارش ہےکہ اگر آپ کو کسی بھی قسم کے سائبر کرائم یا مشکوک آن لائن سرگرمی کی شکایت یا معلومات ہوں، تو فوری طور پر نیشنل سائبر کرائم انوسٹیگیشن ایجنسی کی ہیلپ لائن نمبر 0519106691 یا ای میل [email protected] پر رابطہ کریں۔یاد رہے کہ اب سائبر کرائم کے حوالے سے تحقیقات و شکایات کا ایف آئی اے سے کوئی تعلق نہیں۔ سائبر کرائم کی شکایات سے متعلق رہنمائی اور تعاون کے لیے قریبی ’این سی سی آئی اے‘سرکل وزٹ کریں۔