سہ ملکی ویمنزسیریز ‘ہرمن پریت کوربھارتی ٹیم کی قیادت کریں گی

اسمرتی مندھانا نائب کپتان ہوں گی‘سہ ملکی سیریز 27 اپریل سے 11مئی تک سری لنکا میں کھیلی جائے گی

بدھ 23 اپریل 2025 12:37

نئی دہلی(اُردو پوائنٹ اخبارتازہ ترین - این این آئی۔ 23 اپریل2025ء)بورڈ آف کنٹرول فار کرکٹ ان انڈیا(بی سی سی آئی) کی سلیکشن کمیٹی نے رواں ماہ سری لنکا میں شیڈول خواتین کی تین ملکی سیریز کے لئے ہرمن پریت کور کو 15رکنی سکواڈ کی کپتان نامزد کیا ہے۔ سلیکٹرز کے مطابق ہرمن پریت کور ٹیم کی قیادت کریں گی جبکہ اسمرتی مندھانا نائب کپتان ہوں گی۔ سہ ملکی سیریز میں میزبان سری لنکا،بھارت اور جنوبی افریقا کی خواتین ٹیمیں پنجہ آزما ہوں گی۔

سہ ملکی سیریز 27 اپریل سے 11مئی تک سری لنکا میں کھیلی جائے گی جس کے فائنل سمیت تمام میچز آر پریماداسا سٹیڈیم، کولمبو میں کھیلے جائیں گے اور تمام میچز ڈے ہوں گے۔ بھارتی خواتین ٹیم اپنی مہم کا آغاز 27 اپریل کو میزبان سری لنکن ویمنز ٹیم کے خلاف میچ سے کرے گی۔

(جاری ہے)

سہ ملکی سیریز کے لئے اعلان کردہ بھارتی خواتین ٹیم میں ہرمن پریت کور (کپتان)،اسمرتی مندھانا (نائب کپتان)،پرتیکا راول، ہرلین دیول، جمائما روڈریگز،رچا گھوش (وکٹ کیپر)، یاستیکا بھاٹیہ (وکٹ کیپر)،دیپتی شرما، امنجوت کور، کاشوی گوتم، سنیہ رانا، اروندھتی ریڈی، تیجل حسبنس، سری چرانی، شوچی اپادھیائے شامل ہیں۔

سہ ملکی سیریز کا آغاز 27 اپریل سے ہوگا جب بھارتی ویمنز ٹیم کا مقابلہ میزبان سری لنکا سے ہوگا اور اس سیریز کا فائنل 11 مئی کو کھیلا جائے گا۔ سہ ملکی سیریز میں ہر ٹیم ایک دوسرے کے خلاف چار،چارمیچز کھیلے گی جس میں سرفہرست دو ٹیمیں فائنل کے لیے کوالیفائی کریں گی۔