Live Updates

کراچی کے پسماندہ علاقے میں قائم بچوں کا جمناسٹک کلب

بچوں کیلئے کوئی پارک اور کھیل کا میدان تو نہیں، لیکن وہاں کچھ بچے جمناسٹک سیکھ رہے ہیں

ہفتہ 26 اپریل 2025 11:55

کراچی (اُردو پوائنٹ اخبارتازہ ترین - این این آئی۔ 26 اپریل2025ء)کراچی کے علاقے مچھر کالونی میں ایک ایسا جمناسٹک کلب بھی ہے جہاں غریب بچوں اور بچیوں کو تعلیم کے ساتھ ساتھ جمناسٹک کی تربیت بھی دی جاتی ہے۔خواب صرف دیکھنے کیلئے نہیں ہوتے انہیں حقیقت میں بدلنے کے لئے کوشش کرنا ہوتی ہے، کراچی کے پسماندہ علاقے مچھر کالونی میں ایک ایسا کلب بھی موجود ہے جہاں بچوں کو بلامعاوضہ تعلیم اور جمناسٹک سکھائی جاتی ہے۔

اس علاقے میں بچوں کیلئے کوئی پارک اور کھیل کا میدان تو نہیں، لیکن وہاں کچھ بچے جمناسٹک سیکھ رہے ہیں، یہ بچے کون ہیں اور اس کا انتظام کس نے کیا ہی اس حوالے سے نمائندہ اے آر وائی نیوز کراچی کی رپورٹ کے مطابق کراچی کے علاقے مچھر کالونی میں سماجی ادارہ ’امکان‘ گزشتہ کئی سال سے یہاں کے بچوں کو جمناسٹک سکھا رہا ہے۔

(جاری ہے)

اس جمناسٹک کلب کے انسٹرکٹر محمد فرقان نے بتایا کہ گزشتہ دس سال سے میں یہاں جمناسٹک کی کوچنگ کررہا ہوں جب میں شروع میں یہاں آیا تھا تو یہاں کے بچوں کو صفائی ستھرائی سمیت کسی قسم کی سہولت میسر نہیں تھی لیکن آج ہماری محنت کے صلے میں اس کلب کی بچیاں پچھلے 5 سال سے جمناسٹک چیمپیئن ہیں۔

اس جمناسٹک کلب میں سیکھنے والی زیادہ تر لڑکیاں ہیں جن کا کہنا ہے کہ اس کھیل سے ان کی زندگی میں کئی مثبت تبدیلیاں آئی ہیں۔ ایک بچی کا کہنا تھا کہ جو بچے اپنا وقت گھر میں بیکار گزارتے ہیں وہ یہاں ضرور آئیں اور کچھ سیکھیں۔ایک اور بچی نے بتایا کہ میں نے یہاں سے جمناسٹک سیکھ کر انٹر اسکول کے بعد نیشنل لیول پر بھی کھیلا ہے اور اسی کی بدولت مجھے پاک آرمی میں ملازمت ملی۔جمناسٹک کلب کے ان بچوں کا کہنا ہے کہ اگر ان کی سپورٹ کی جائے اور اچھے مواقع فراہم کیے جائیں تو ہم بھی عالمی سطح پر پاکستان کا نام دنیا بھر میں روشن کرسکتے ہیں۔