ڈینیئل مدویدیف اور ٹیلر فریٹز میڈرڈ اوپن ٹینس مینز سنگلز ٹاپ 16 رائونڈ میں پہنچ گئے

پیر 28 اپریل 2025 10:40

میڈرڈ (اُردو پوائنٹ اخبارتازہ ترین - اے پی پی۔ 28 اپریل2025ء) روس کے نامور ٹینس ڈینیئل مدویدف اور امریکی ٹینس سٹار ٹیلر فریٹز اپنی عمدہ کارکردگی کی بدولت اے ٹی پی میڈرڈ اوپن ٹینس ٹورنامنٹ میں مردوں کے سنگلز مقابلوں کے پری کوارٹر فائنل رائونڈ میں پہنچ گئے ۔29 سالہ روسی ٹینس کھلاڑی ڈینیئل مدویدیف نے مینز سنگلز مقابلوں کے تیسرے رائونڈ میچ میں ارجنٹائن کے حریف ٹینس کھلاڑی جان مینوئل سیرنڈولو کو شکست دی جبکہ 27 سالہ امریکی ٹینس کھلاڑی ٹیلر فریٹز نے تیسرے رائونڈ میچ میں فرانسیسی حریف کھلاڑی بنیامین بونزی کے دوسرے رائونڈ میں مقابلے سے دستبردار ہونے کے بعد ٹاپ 16 رائونڈ کے لئے کوالیفائی کرلیا۔

اے ٹی پی کے زیر اہتمام میڈرڈ اوپن کے دلچسپ مقابلے سپین کے دارالحکومت میڈرڈ کے وینیو پارک منزاناریس میں جاری ہیں جس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔

(جاری ہے)

مردوں کے سنگلز مقابلوں کے تیسرے رائونڈ کے میچ میں 29 سالہ روسی ٹینس کھلاڑی ڈینیئل مدویدیف نے انتہائی شاندار کارکردگی کا مظاہرہ کرتے ہوئے ارجنٹائن کے حریف ٹینس کھلاڑی جان مینوئل سیرنڈولو کو سٹریٹ سیٹس میں 2-6 اور 2-6سے شکست دے کرنہ صرف ٹورنامنٹ سے باہر کر دیا بلکہ پری کوارٹر فائنل رائونڈ کے لئے بھی کوالیفائی کرلیا۔

ایک اور میچ میں 27 سالہ امریکی ٹینس کھلاڑی ٹیلر فریٹز کو فرانسیسی حریف کھلاڑی بنیامین بونزی کے خلاف پہلے سیٹ میں 6-4کی شکست کے بعد دوسرے سیٹس میں 5-7 کی فتح حاصل تھی کہ فرانسیسی حریف کھلاڑی مقابلہ جاری نہ رکھ سکے اور مقابلے سے دستبردار ہو گئے۔ یوں امریکی ٹینس سٹار نے ٹاپ 16 رائونڈ کے لئے کوالیفائی کرلیاجہاں ان کا مقابلہ ناروے کے کیسپر رڈ سے ہوگا۔\932