جانوروں کی غذائی ضروریات کو پورا کرنے کے لئے کاشتکار سدابہار چارہ روڈ گراس کاشت کریں، ڈپٹی ڈائریکٹر زراعت (توسیع)

منگل 29 اپریل 2025 17:08

فیصل آباد (اُردو پوائنٹ اخبارتازہ ترین - اے پی پی۔ 29 اپریل2025ء) ڈپٹی ڈائریکٹر زراعت (توسیع) حافظ عدیل احمد نے کہا کہ جانوروں کی غذائی ضروریات کو پورا کرنے کے لئے کاشتکارروڈزگراس سدابہار چارہ جات کاشت کریں۔انہوں نے کہا کہ روڈز گراس سدابہار چارہ جات میں غذائی اعتبار سے ایک اعلیٰ درجے کا چارہ ہے اور اس کی کاشت کیلئے گرم مر طوب آب و ہواموزوں ہے۔

انہوں نے بتایا کہ روڈز گراس متعدد کٹائیاں دینے والا دائمی نوعیت کا چارہ ہے اور اس کو ایک بار کاشت کرنے سے کم ازکم تین سال تک اچھی پیداوار لی جاسکتی ہے۔انہوں نے مزید کہا کہ کاشتکار روڈ گراس کی کاشت بھاری میرا زمین جس میں پانی کے نکاس کا خاطر خواہ انتظام ہو میں کریں۔ انہوں نے کہا کہ 3سے 4 مرتبہ ہل بمعہ سہاگہ چلا کر زمین کو اچھی طرح تیار کر لیا جائے جبکہ زمین بالکل نرم، بھر بھری اور ہموار ہونی چاہیے۔

(جاری ہے)

انہوں نے کہا کہ فصل کی کاشت سال میں دو بار کی جا سکتی ہے جو کہ بیج اور جڑوں دونوں سے ہو سکتی ہے نیز 5سے 8 کلو بیج یا 11000 سے 12000 قلمیں فی ایکڑ کافی ہوتی ہیں۔ حافظ عدیل احمدنے کہا کہ قلموں کے ذریعہ کاشت کی صورت میں اس بات کا خاص خیال رکھا جائے کہ ہر قلم پر کم از کم دو دو آنکھیں موجود ہوں اورقلموں کو لگاتے وقت ان کو ایک طرف جھکائیں جبکہ قلم کی ایک آنکھ زمین کے اندر اور دوسری باہر ہونی چاہیے اسی طرح قلموں اور لائنوں کا درمیانی فاصلہ 2 فٹ رکھا جائے۔

انہوں نے کہا کہ جڑوں کے ذریعہ روڈز گراس کی کاشت جولائی اور اگست میں کی جا سکتی ہے جبکہ بیج سے کاشت کی صورت میں اسے چھٹہ کی بجائے ایک فٹ کے فاصلہ پر بذریعہ ڈرل قطاروں میں کاشت کر کے شاندار فصل کا حصول بھی ممکن بنایا جاسکتا ہے۔

Facebook Twitter Google + Share on Whatsapp

جانوروں کی غذائی ضروریات کو پورا کرنے کے لئے کاشتکار سدابہار چارہ روڈ گراس کاشت کریں، ڈپٹی ڈائریکٹر زراعت (توسیع)

متعلقہ عنوان :

مزید زراعت کی خبریں