شام کے علاقے صحنایا میں آپریشن ختم، فورسز نے کنٹرول سنبھال لیا

جلد ہی صحنایا میں حالات معمول پر آجائیں گے، کنٹری سائیڈ سکیورٹی ڈائریکٹوریٹ

جمعرات 1 مئی 2025 12:04

دمشق(اُردو پوائنٹ اخبارتازہ ترین - این این آئی۔ 01 مئی2025ء)شام کے علاقے صحنایا میں حکومت سے وابستہ گروپ اور دروز کمیونٹی کے افراد میں خون ریز جھڑپوں کے بعد شامی حکام نے اعلان کیا ہے کہ انہوں نے سلامتی اور استحکام کو یقینی بنانے کے لیے دمشق کے قریب صحنایا کے علاقے میں فورسز کو تعینات کر دیا ہے۔غیرملکی خبررساں ادارے کے مطابق دمشق کے کنٹری سائیڈ سکیورٹی ڈائریکٹوریٹ کے ڈائریکٹر لیفٹیننٹ کرنل حسام الطحان نے کہا کہ ہم اشرفیہ صحنایا کے علاقے میں سکیورٹی آپریشن کے خاتمے اور سکیورٹی اور استحکام کی واپسی کو یقینی بنانے کے لیے علاقے کے محلوں میں پبلک سیکیورٹی فورسز کی تعیناتی کا اعلان کر رہے ہیں۔

جلد ہی صحنایا میں حالات معمول پر آجائیں گے۔ شام کی وزارت خارجہ نے اسرائیلی حملوں کے حوالے سے جاری ایک بیان میں ہر قسم کی غیر ملکی مداخلت کو مسترد کرنے پر زور دیا۔

(جاری ہے)

وزارت خارجہ نے دروز سمیت آبادی کے تمام اجزا کے تحفظ کے لیے اپنے عزم پر زور دیا۔ وزارت خارجہ کے بیان میں کہا گیا کہ شامی عرب جمہوریہ بغیر کسی استثنی شامی عوام کے تمام اجزا کے تحفظ کے لیے اپنے غیر متزلزل عزم کا اعادہ کرتا ہے۔ اس شامی عوام میں دروز بھی شامل ہیں جو شام کے قومی تانے بانے کا ایک لازمی حصہ رہی ہے اور اب بھی ہے۔ ساتھ ہی شام اندرونی معاملات میں ہر قسم کی بیرونی مداخلت کو واضح طور پر مسترد کرتا ہے۔