چور تخلیق کار کیسے ہوسکتا ہی نواز الدین صدیقی نے بالی ووڈ پر چوری کا الزام عائد کردیا

منگل 6 مئی 2025 23:02

ممبئی (اُردو پوائنٹ اخبارتازہ ترین - آن لائن۔ 06 مئی2025ء)بھارتی اداکار نوازالدین صدیقی کا بالی ووڈ پر تنقید کرتے ہوئے کہنا ہے کہ انڈسٹری کو تخلیقی دیوالیے کا سامنا ہے۔بھارتی میڈیا رپورٹ کے مطابق اداکار نوازالدین صدیقی نے حالیہ انٹرویو میں بالی ووڈ کی تخلیقی صورتحال پر کھل کر بات کی، جس میں انہوں نے موجودہ فلمی رجحانات کو شدید تنقید کا نشانہ بنایا۔

ان کا کہنا تھا کہ فلم انڈسٹری اس وقت ایک مخصوص دہرائے جانے والے فارمولا پر انحصار کر رہی ہے، جہاں نئی کہانیوں اور تجربات کی جگہ پرانے ہٹ فلموں کے سیکوئلز اور ری میکس کو ترجیح دی جا رہی ہے کیونکہ نئی کہانیاں کسی کے پاس ہیں ہی نہیں۔نوازالدین کے مطابق یہ رجحان فلم سازوں کے بڑھتے ہوئے عدم تحفظ کا آئینہ ہے، جو نیا مواد پیش کرنے سے ہچکچاتے ہیں اور صرف آزمائے ہوئے فارمولوں پر کام کرنا زیادہ محفوظ سمجھتے ہیں۔

(جاری ہے)

انہوں نے بالی ووڈ انڈسٹری پر شدید تنقید کرتے ہوئے کہا کہ ایک چور تخلیقی کیسے ہوسکتا ہے۔ اس صورتحال کو انہوں نے "تخلیقی دیوالیہ پن" قرار دیا، اور کہا کہ یہاں تک کہ جن فلموں کو "کلٹ کلاسکس" کہا جاتا ہے، ان کی بنیاد بھی مکمل طور پر اصل نہیں ہوتی وہ بھی چوری شدہ مواد ہوتا ہے۔نواز نے ہدایتکار انوراگ کشیپ کی بھی حمایت کی، جنہوں نے خود کو بالی ووڈ کے زہریلے ماحول سے دور کر لیا ہے۔ نواز الدین صدیقی کا کہنا تھا کہ انڈسٹری کو نئی آوازوں اور خیالات کے لیے دروازے کھولنے کی ضرورت ہے۔یاد رہے کہ نوازالدین ان دنوں اپنی آنے والی فلم کوسٹا کی تشہیری مہم میں مصروف ہیں۔