بینظیرانکم سپورٹ پروگرام اور Karandaaz ادائیگی کے ڈیجیٹل نظام کے نفاذ کیلئے تیار

سینیٹر روبینہ خالد کا بی آئی ایس پی مستحقین میں رقوم کی تقسیم کیلئے نئے ڈیجیٹل ادائیگیوں کے نظام کے فوری آغازپرزور

پیر 12 مئی 2025 18:34

بینظیرانکم سپورٹ پروگرام اور Karandaaz ادائیگی کے ڈیجیٹل نظام کے نفاذ کیلئے ..

اسلام آباد (اُردو پوائنٹ اخبارتازہ ترین - این این آئی۔ 12 مئی2025ء) چیئرپرسن بی آئی ایس پی سینیٹرروبینہ خالد نے بی آئی ایس پی ہیڈکوارٹرز اسلام آباد میں کار انداز کے چیف ڈیجیٹل آفیسر شرجیل مرتضیٰ کے ہمراہ اہم ملاقات کی جس کا مقصد ملک کے سات منتخب مرکزی اضلاع میںراست کے ذریعے ڈیجیٹل ادائیگیوں کے نظام کے پائلٹ منصوبے کو تیز رفتاری سے لانچ کرنا تھا ۔

چیئرپرسن بی آئی ایس پی نے مستحقین کو سہولت کی فراہمی پر زور دیتے ہوئے کہا کہ مستحقین کی نقل و حرکت اور بائیومیٹرک تصدیق نہایت اہم ہے اوراس پر کوئی سمجھوتہ نہیں کیا جا سکتا۔ انہوںنے کہاکہ ہمارا مقصد اپنی ایک کروڑ مستحق خواتین کی زندگیوں کو آسان بنانا ہے۔انہوںنے کہاکہ ہمیں ایک فعال اور بروقت حکمت عملی اختیار کرنی چاہیے تاکہ منصوبے کا شفاف اور کامیاب نفاذ یقینی بنایا جا سکے۔

(جاری ہے)

کار انداز کے چیف ڈیجیٹل آفیسر شرجیل مرتضیٰ نے چیئرپرسن کو پائلٹ پراجیکٹ کی موجودہ پیشرفت سے آگاہ کیا اور کہا کہ پائلٹ منصوبے انتہائی اہمیت کے حامل ہوتے ہیں اور ہم بی آئی ایس پی ٹیم کے ساتھ مل کر اس منصوبے کی کامیابی کے لیے ہر ممکن کوشش کر رہے ہیں۔اجلاس میں پائلٹ بنیادوں پر موبائل والٹ کے ذریعے ادائیگیوں کے طریقہ کار پر بھی تبادلہ خیال کیا گیا تاکہ اس کی افادیت اور کارکردگی کا جائزہ بھی لیا جا سکے۔

اجلاس میں فیصلہ کیا گیا کہ منصوبے کی رفتارکو مزید تیز کرنے کے لیے دیگر شراکت دار اداروں کو بھی مشاورت میں شامل کیا جائے گا۔ اجلاس میں کاراندازسے زوہیب اورعمر جبکہ بی آئی ایس پی سے ڈی جی کنڈیشنل ٹرانسفرز جناب انعام الرحمٰن ملک نے بھی شرکت کی اور منصوبے کے آپریشنل پہلوؤں پر اپنی قیمتی آرا پیش کیں۔