Live Updates

مون سون کا اب تک کا سب سے تگڑا اسپیل، پنجاب کیلئے بھی الرٹ جاری کر دیا گیا

بالائی پنجاب میں طوفانی بارشوں سمیت کلاؤڈ برسٹنگ کے خدشات، پروونشل ڈیزاسٹر مینجمنٹ اتھارٹی نے خبردار کر دیا

محمد علی اتوار 17 اگست 2025 00:30

مون سون کا اب تک کا سب سے تگڑا اسپیل، پنجاب کیلئے بھی الرٹ جاری کر دیا ..

لاہور(اُردو پوائنٹ اخبارتازہ ترین۔ 16 اگست2025ء) مون سون کا اب تک کا سب سے تگڑے اسپیل، پنجاب کیلئے بھی الرٹ جاری کر دیا گیا، بالائی پنجاب میں طوفانی بارشوں سمیت کلاؤڈ برسٹنگ کے خدشات، پروونشل ڈیزاسٹر مینجمنٹ اتھارٹی نے خبردار کر دیا۔ تفصیلات کے مطابق خیبرپختونخواہ، گلگت بلتستان اور آزاد کشمیر میں تباہی مچانے والی مون سون کی طوفانی بارشوں نے اب پنجاب اور دیگر صوبوں کا بھی رخ کر لیا ہے۔

آئندہ چند روز کے دوران پنجاب میں بھی غیر معمولی طوفانی بارشیں ہونے کا امکان ہے۔ پروونشل ڈیزاسٹر مینجمنٹ اتھارٹی کی جانب سے بتایا گیا ہے کہ مون سون بارشوں کا ساتواں اسپیل زیادہ مضبوط ہے، اس اسپیل کے تحت آئندہ 24 گھنٹوں میں شدید بارشوں کا امکان ہے۔ مون سون کے ساتویں اسپیل کے دوران بالائی پنجاب میں طوفانی بارشوں سمیت کلاؤڈ برسٹنگ کے خدشات ہیں۔

(جاری ہے)

اس حوالے سے محکمہ موسمیات کی رپورٹ بھی سامنے آئی ہے۔ محکمہ موسمیات نے مون سون کی شدت بڑھنے کی پیش گوئی کر دی۔ اتوار سے 19اگست تک کشمیر، گلگت بلتستان اور خیبرپختونخواہ کے مختلف علاقوں میں بارشوں کا امکان ہے، اسلام آباد، مری، گلیات اور پنجاب کے کئی شہروں میں بھی بارش متوقع ہے۔ محکمہ موسمیات کے مطابق 18سے 20اگست تک جنوبی پنجاب اور 17سے 22اگست تک کراچی سمیت سندھ کے مختلف حصوں میں بارشیں ہوں گی۔

بلوچستان میں بھی 17سے 20اگست کے دوران بارش کا امکان ہے۔ بارشوں کے نتیجے میں چترال، دیر، سوات اور شانگلہ سمیت کئی برساتی نالوں میں طغیانی کا خدشہ ظاہر کر دیا گیا۔ اسلام آباد، راولپنڈی، شمال مشرقی پنجاب اور کشمیر کے برساتی نالوں میں بھی طغیانی کا خطرہ ہے۔ محکمہ موسمیات نے خبردار کیا ہے کہ بارشوں سے سندھ، پنجاب اور خیبرپختونخوا ہ کے نشیبی علاقے زیر آب آسکتے ہیں جبکہ ملک کے بالائی علاقوں میں لینڈ سلائیڈنگ کا بھی امکان ہے۔