کاروباری اداروں کو درپیش ٹیکس سے متعلق چیلنجز کو حل کرنے کیلئے ہر ممکن اقدام اٹھایا جائے گا ، چیف کمشنر ان لینڈ ریونیو

اسلام آباد (اُردو پوائنٹ اخبارتازہ ترین - اے پی پی۔ 13 مئی2025ء) چیف کمشنر ان لینڈ ریونیو اسلام آباد عابد محمود نے ملک کی اقتصادی ترقی میں کاروباری برادری کے اہم کردار کو تسلیم کرتے ہوئے اسے ضروری سہولیات فراہم کرنے کے لیے اپنے محکمے کے عزم کا اعادہ کیا ہے۔ انہوں نے یقین دلایا کہ کاروباری اداروں کو درپیش ٹیکس سے متعلق چیلنجز کو حل کرنے کے لیے ہر ممکن اقدام اٹھایا جائے گا ۔

اسلام آباد چیمبر آف کامرس اینڈ انڈسٹری (آئی سی سی آئی) کے دورے کے دوران تاجر رہنمائوں کے ایک بڑے اجتماع سے خطاب کرتے ہوئے چیف کمشنر نے ڈیجیٹائزیشن کے ذریعے ٹیکس کے نظام کو آسان بنانے کے لیے جاری کوششوں کو اجاگر کیا جس کا مقصد ٹیکس کی تعمیل کو بہتر بنانا اور کاروبار کرنے میں آسانی ہے۔

(جاری ہے)

ان کے ہمراہ سینئر ٹیکس حکام جن میں بشریٰ جعفر (کمشنر ریفنڈ زون)، نوید خان ترین (کمشنر ود ہولڈنگ ٹیکسز زون)، سید مناف (کمشنر نارتھ زون) اور ظفر جمال جسرا (ایڈیشنل کمشنر، ہیڈ کوارٹر) بھی موجود تھے۔

عابد محمود نے ٹیکس جمع کرنے والوں اور ٹیکس دہندگان کے درمیان باہمی اعتماد کے رشتے کو فروغ دینے کی اہمیت پر روشنی ڈالی اور کہا کہ مارکیٹوں کا دورہ کرنے، آگاہی سیشن منعقد کرنے اور ٹیکس گوشوارے جمع کرانے میں مدد کے لیے ٹیمیں تشکیل دی جائیں گی۔ انہوں نے زور دے کر کہا کہ ٹیکس کے نظام میں زبردستی یا دھمکی کے ماحول کی کوئی گنجائش نہیں ہے اور اس امر کا اعادہ کیا کہ ان کا دفتر ٹیکس دہندگان کی مدد کے لیے ہر وقت کھلا ہے۔

انہوں نے مزید کہا کہ خدمات کو یقینی بنانے کے لیے بزرگ شہریوں اور خواتین کے لیے خصوصی سہولت کاری کائونٹر بھی قائم کیے گئے ہیں۔آئی سی سی آئی کے صدر ناصر منصور قریشی نے چیف کمشنر کے خیالات کا خیرمقدم کیا اور تاجر برادری کے لیے مناسب احترام کی ضرورت پر زور دیا۔ انہوں نے فیڈرل بورڈ آف ریونیو (ایف بی آر) پر زور دیا کہ وہ موجودہ ٹیکس دہندگان پر اضافی بوجھ ڈالنے کے بجائے ٹیکس کے دائرے کو بڑھانے کے لیے چیمبرز کے ساتھ قریبی رابطہ کاری میں کام کرے۔

صدر ناصر منصور قریشی نے ٹیکس دہندگان کے لیے دوستانہ کلچر کے فروغ کیلئے پالیسی سازی میں کاروباری برادری کو شامل کرنے کی اہمیت پر زور دیا ۔ انہوں نے مزید کہا کہ تعمیل کرنے والے ٹیکس دہندگان کو پرکشش مراعات دینے سے خدشات کم ہوں گے اور ٹیکس کی شراکت میں اضافہ ہوگا۔آئی سی سی آئی کے ایگزیکٹو ممبر چوہدری ندیم احمد، فاطمہ عظیم، کونسل ممبر محمد اعجاز عباسی، محمد مسعود چوہدری، تاجر رہنما اسد عزیز، نعیم اقبال، آئی سی سی آئی کے صدر کے مشیر نعیم صدیقی نے بھی ایف بی آر سے متعلق تاجر برادری کو درپیش مسائل پر روشنی ڈالی اور دیرینہ ٹیکس مسائل کے حل کے لیے تعاون جاری رکھنے پر زور دیا۔

نمایاں شرکا میں نائب صدر ناصر محمود چوہدری، ایگزیکٹو ممبران، میاں شوکت مسعود، روحیل انور بٹ، اسحاق سیال، عمران منہاس، ذوالقرنین عباسی، عرفان چوہدری، محسن خالد ملک، میاں محمد رمضان کنوینر ٹیکس سٹینڈنگ کمیٹی، آئی سی سی آئی کے ممبران شاہد ظفر اور احمد خان سمیت دیگر نے کثیر تعداد میں شرکت کی۔