نیشنل ویمنز ٹی 20 کرکٹ ٹورنامنٹ میں اسٹارز اور چیلنجرز نے اپنے اپنے میچ جیت لیے

منگل 13 مئی 2025 19:50

راولپنڈی (اُردو پوائنٹ اخبارتازہ ترین - اے پی پی۔ 13 مئی2025ء) نیشنل ویمنز ٹی 20 کرکٹ ٹورنامنٹ میں اسٹارز اور چیلنجرز نے اپنے اپنے میچ جیت لیے۔ نیشنل بینک اسٹیڈیم میں کھیلے گئے میچ میں اسٹارز نے کانکررز کو 23 رنز سے شکست دے دی۔ اسٹارز نے پہلے بیٹنگ کرتے ہوئے 8 وکٹوں کے نقصان پر 145 رنز بنائے۔ اوپنر سدرہ امین نے شاندار کارکردگی کا مظاہرہ کرتے ہوئے 3 چھکوں اور 7 چوکوں کی مدد سے 78 رنز بنائے اور ٹاپ اسکورر رہیں۔

کانکررز کی جانب سے فاطمہ ثنا نے بہترین باؤلنگ کا مظاہرہ کرتے ہوئے 34 رنز دے کر 3 کھلاڑیوں کو آؤٹ کیا۔ جواب میں کانکررز کی ٹیم 7 وکٹوں پر 122 رنز ہی بنا سکی۔ فاطمہ ثنا نے 38 جبکہ نجیہہ علوی نے 39 رنز (ناٹ آؤٹ) اسکور کیے۔ اسٹارز کی باؤلنگ میں انوشے ناصر، نیلم مشتاق اور وحیدہ اختر نے دو ، دو وکٹیں حاصل کیں۔

(جاری ہے)

سدرہ امین کو شاندار اننگز کھیلنے پر پلیئر آف دی میچ قرار دیا گیا۔

دوسرا میچ اوول اکیڈمی گراؤنڈ میں کھیلا گیا جہاں چیلنجرز نے اسٹرائیکرز کو 7 رنز سے شکست دی۔ چیلنجرز نے پہلے بیٹنگ کرتے ہوئے 7 وکٹوں پر 145 رنز بنائے۔ عالیہ ریاض 35 رنز کے ساتھ نمایاں رہیں۔ اسٹرائیکرز کی طرف سے ڈیانا بیگ اور ذونیش ستار نے تین تین وکٹیں حاصل کیں۔ ہدف کے تعاقب میں اسٹرائیکرز کی ٹیم 7 وکٹوں کے نقصان پر 138 رنز بنا سکی۔ ایمان فاطمہ نے 9 چوکوں کی مدد سے 56 رنز کی شاندار اننگز کھیلی۔ چیلنجرز کی جانب سے صدف شمس نے 31 رنز کے عوض 3 وکٹیں حاصل کیں اور پلیئر آف دی میچ قرار پائیں۔