آم کے تیلے کے تدارک کیلئے باغبان پودوں کی کانٹ چھانٹ کرکے سورج کی روشنی اور ہوا کی آمد و رفت کو بہتر بنائیں، محکمہ زراعت پنجاب

منگل 13 مئی 2025 20:10

لاہور (اُردو پوائنٹ اخبارتازہ ترین - اے پی پی۔ 13 مئی2025ء) ترجمان محکمہ زراعت پنجاب کے مطابق آم کے تیلے کے تدارک کیلئے باغبان پودوں کی کانٹ چھانٹ کرکے سورج کی روشنی اور ہوا کی آمد و رفت کو بہتر بنائیں، یہ ایک خطرناک کیڑا ہے جو پودوں کو بہت نقصان پہنچاتا ہے، سپرے سے قبل بٹور کی کٹائی کرکے زمین میں دبا دیں تاکہ تیلے کو پرورش کا موقع نہ ملے۔

(جاری ہے)

ترجمان نے مزید کہا کہ باغبان آم کے تیلے کے کنٹرول کیلئے نائٹروجنی کھادکے زیادہ استعمال اور زیادہ آبپاشی سے گریز کریں۔درختوں کے تنوں پر موسم گرما میں دوپہر کے وقت محکمہ زراعت پنجاب کے مقامی ماہرین کے مشورہ سے سپرے کرنے سے تیلے کا سدباب ہو جاتا ہے۔پودوں کو مکمل طور پر سپرے کرنے سے پہلے درختوں کی اندرونی اور بعد ازاں بیرونی شاخوں پر بھی سپرے کریں۔آم کے درختوں کے تنوں اور موٹے ٹہنوں پر سپرے کئے بغیر مطلوبہ نتائج حاصل نہیں کئے جا سکتے۔شدید حملہ کی صورت میں باغبان پانچ دن کے وقفہ سے دوبارہ سپرے کریں۔