علی رضا عابدی قتل کیس :سزا یافتہ ملزمان کی اپیل کی سماعت جون کے پہلے ہفتے تک ملتوی

استغاثہ کے مطابق انسداد دہشتگردی کی خصوصی عدالت نے ملزمان عبدالحسیب ،محمد فاروق اور ابوبکر کو عمر قید کی سزا سنائی تھی

جمعہ 16 مئی 2025 20:17

کراچی(اُردو پوائنٹ اخبارتازہ ترین - این این آئی۔ 16 مئی2025ء) سندھ ہائیکورٹ نے ایم کیو ایم رہنما علی رضا عابدی کے مقدمہ قتل کیس میں ماتحت عدالت کے فیصلے کیخلاف سزا یافتہ ملزمان کی اپیل کی سماعت جون کے پہلے ہفتے تک ملتوی کردی۔جمعہ کو سندھ ہائیکورٹ میں ایم کیو ایم رہنما علی رضا عابدی کے مقدمہ قتل کیس میں ماتحت عدالت کے فیصلے کیخلاف سزا یافتہ ملزمان کی اپیل کی سماعت ہوئی۔

ملزم ابوبکر اور محمد فاروق غزالی کے وکیل عماد غفار ایڈووکیٹ نے وکالت نامہ جمع کرادیا۔ عماد غفار ایڈووکیٹ ملزم عبد الحسیب کی پیروی بھی کررہے ہیں۔

(جاری ہے)

عدالت نے اپیل کی سماعت جون کے پہلے ہفتے تک ملتوی کردی۔استغاثہ کے مطابق انسداد دہشتگردی کی خصوصی عدالت نے ملزمان کو عمر قید کی سزا سنائی تھی۔ ملزمان کو دہشتگردی ایکٹ میں بھی عمر قید کی سزا سنائی گئی تھی۔

ملزمان میں عبد الحسیب، محمد فاروق غزالی اور ابو بکر شامل ہیں۔ عدالت نے ملزمان پر ایک لاکھ روپے فی کس جرمانہ بھی عائد کیا تھا۔ ملزم محمد فاروق، حسنین، غلام مرتضی عرف کالی چرن مفرور ہیں۔ ملزمان کیخلاف گذری تھانے میں مقدمہ درج کیا گیا تھا۔ متحدہ قومی موومنٹ کے رہنما علی رضا عابدی کو دسمبر 2018 میں قتل کیا گیا تھا۔